Bakı. Aqşin Rafiqoğlu – APA-Economics. Ümumdünya Gömrük Təşkilatının (ÜGT) Bakı şəhərindəki Potensialın Gücləndirilməsi üzrə Avropa Regional Ofisində BMT-nin Narkotik və Cinayətkarlığa Qarşı Mübarizə İdarəsinin və ÜGT-nin birgə layihəsi olan “Konteyner Daşınmalarına Nəzarət üzrə Qlobal Proqram” layihəsi çərçivəsində təlimlərə başlayıb.
Dövlət Gömrük Komitəsindən “APA-Economics”ə verilən məlumata görə, Azərbaycan, Qazaxıstan, Türkmənistan, Özbəkistan və Tacikistanın gömrük orqanlarının əməkdaşlarının qatıldığı təlimlərdə ÜGT-nin nümayəndələri Peter Timmermans, Cesar Sohiaffino və DGK-nin mütəxəssisləri tərəfindən iştirakçılara risklərin idarə olunması və qiymətləndirilməsi, elektron qeydiyyat, konteyner plomblarının saxtalaşdırılması və digər mövzularda məlumat verilir. Mütəxəssislər beynəlxalq təcrübədən nümunələr gətirərək bu proqramın icra olunması ilə birlikdə gömrük sahəsində hüquqpozmaların və narkotik qaçaqmalçılığının qarşısının alınmasında ciddi nailiyyətlərin əldə olunacağını vurğulayıblar.
Təlimlərin ikinci günündə proqram çərçivəsində BMT-nin Narkotiklər və Cinayətkarlığa Qarşı Mübarizə İdarəsi tərəfindən Azərbaycan gömrüyünə 2 ədəd kimyəvi maddələrin müəyyən edilməsində istifadə olunan “Hazmat” avadanlığı təqdim edilib. Bu münasibətlə keçirilən imzalama mərasimində BMT-nin Orta Asiya ofisinin nümayəndəsi Batır Geldiyev və Azərbaycan DGK-nin sədr müavini Rza Həsənəliyev iştirak edib. R. Həsənəliyev təqdim edilən avadanlığa görə komitə rəhbərliyi adından minnətdarlığını bildirərək bu avadanlığın gömrükçülərin işini həm keyfiyyət, həm də kəmiyyət baxımından artıracağını, eyni zamanda tərəflər arasındakı əməkdaşlığın vacibliyini vurğulayıb.
Öz növbəsində B. Geldiyev də təlimlərin yüksək səviyyədə təşkilinə və qonaqpərvərliyə görə minnətdarlığını bildirib. Azərbaycanın narkotik qaçaqmalçılığı ilə mübarizədə mühüm rol oynadığını qeyd edən BMT rəsmisi qarşılıqlı əməkdaşlığın və təcrübə mübadiləsinin önəmindən danışıb.
Qeyd edək ki, Bakı Baş Gömrük İdarəsi və Astara Gömrük İdarəsində istismara veriləcək “Hazmat” avadanlığı naməlum kimyəvi maddələrin tərkibinin yerindəcə müəyyən edilməsinə və prosesin həyata keçirilməsinə sərf olan vaxt itkisinin aradan qaldırılmasına imkan verəcək. Yaxın günlərdə isə avadanlığın istifadə olunması ilə bağlı xarici mütəxəssislər tərəfindən Azərbaycan gömrükçülərinə xüsusi təlimlər keçiriləcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
