Hadisə

Bakı. Şəhriyar Əlizadə - APA. Bakı Ağır Cinayətlər Məhkəməsində həbsdə olan sabiq deputat Gülər Əhmədovanın cinayət işi üzrə məhkəmən prosesi davam etdirilib.

APA-nın məlumatına görə, hakim Əlisultan Osmanovun sədrliyi ilə keçirilən prosesdə prosesdə Gülər Əhmədova çıxış edib.

O, bir il 2 aydır ətrafında şər-böhtan nəticəsində həbsdə olduğunu deyib: “KİV-lərə üzümü tutub birinci və axırıncı dəfə açıqlama verirəm. Elşadın iddia elədiyi kimi, bizim mandat alveri söhbətimiz olmayıb. Orada heç bir vəzifəli şəxsin adı çəkilməyib. Vaxt gələcək, görəcəksiniz ki, mən deyənlər düz idi. Elşadın qurbanlarının sayını mətbuata ötürəcəyəm. Mən sizdən xahiş edirəm, haqqımda yalan şeylər yazmayın. O, mühacir adı almaq istəyir. Təəssüf ki, onu buraya gətirə bilmirlər. Mən buradan çıxandan sonra onu Fransada tapıb məhkəməyə verəcəyəm, həbs etdirəcəyəm. Sevincin ailəsini o maliyyələşdirir. Lakin mən onun təhdidlərinə əyilən deyiləm. Mənim haqqımda proqnoz verməyin. Sizə söz verirəm, ölməyəcəyəm. Mən Sevinc deyiləm. Onun maskasını yırtacağam”.

Daha sonra prosesdə Sevinc Babayevanın bacısı Vəfa Babayeva ifadə verib. Şahid bildirib ki, bacısı Gülər Əhmədova ilə toyuq kababı yeyib, ondan sonra zəhərləndiyini deyib: "Ondan sonra Sevincin vəziyyəti yaxşılaşmadı. Həkimlər deyirdilər, dərdinin nə olduğunu bilmirlər”.

Sonra V. Babayeva sualları cavablandırıb. Bildirib ki, Gülərlə Sevincin rəfiqə olduqlarını barədə məlumatı olub: “Sevinc zəhərlənən vaxt dedi ki, Elşadla Gülərin pul söhbəti olub, ona görə küsüblər, lakin artıq barışıblar. Türkiyəyə gedəndən sonra isə zəng elədi. Dedim bu, nə məsələdir, niyə bizi biabır elədin? Səni televizorda göstərirlər. O da dedi ki, bir oyundur, düşüb. Dedi ki, mənə heç nə olmaz, Gülər arxamda dayanıb. Bacım Təranə ilə Ayxan Türkiyədən Sevincin yanından gələndə dedilər ki, onun vəziyyəti pisdir, arıqlayıb. Səlcuq adlı bir kişi onun danışıqlarına qulaq asır. Bayıra buraxmır. 2012-ci ildə mən ay yarım bacımın yanında qaldım, onu tək buraxmaq istəmirdik. Sentyabrın əvvəllərində ona zəng gəldi. Sevinc telefonda həmin adama dedi ki, Gülərə deyib, pulu qaytaracaq. Sonra da başladı ağlamağa. Mənə deyirdi ki, Elşadla pul məsələsi var. Gülər pulu qaytarmır. Gülərə də, Elşada da qarğış edirdi. Deyirdi ki, Gülər pulu qaytarsaydı, o da problem yaşamazdı. Bacım deyirdi ki, bu elə məsələdir ki, danışa bilməz. Danışsa, öldürərlər. Sevinc Elşaddan və Gülərdən qorxurdu. Sevinc evdə tək qalanda da qorxurdu, gecələr şam işığında otururdu. Tez-tez mənə deyirdi ki, gözlükdən bax gör, kimsə yoxdur? Sevinc Türkiyədə olanda video haqqında danışmağa və onun adını çəkməyə qoymurdu. Sevinc Türkiyədə olanda anam Gülərə zəng elədi ki, Sevincin axırı necə olacaq? Gülər də dedi ki, Sevinci müalicəyə göndərib, etibarlı əllərdədir”.

Daha sonra şahid G. Əhmədovanın suallarına cavab verib. G. Əhmədova ona müraciət edib: “Vəfa, siz bizdə olanda dediniz ki, keşişə baxdırmısınız. Deyib ki, Sevinci zəhərləyiblər, 6 ay ömrü qalıb. Mən də israrla soruşdum ki, kim zəhərləyib? Hətta dedim ki, mən də baxdırmaq istəyərəm, görüm mənə nə deyər. Niyə onda demirdiniz, bu sözləri? Niyə Sevinc öləndən sonra Ayxan çıxıb deyir ki, anamı Gülər zəhırləyib?"

V. Babayeva bildirib ki, həqiqətən belə hadisə olub: “Keşiş mənə elə demişdi”.

Daha onun istintaqa verdiyi ifadə elan olunub. Şahid ifadəsində bildirib ki, Sevinc Babayeva Gülər Əhmədova tərəfindən zəhərləndiyini deyib.

Prosesdə şahid qismində Rüxsarə Axundova ifadə verib. Şahid bildirib ki, Gülər Əhmədovanın rəfiqəsi, Respublika Uşaq Təşkilatında G. Əhmədovanın müavini olub: “Sevinclə mənim münasibətim yox idi, bir neçə dəfə görmüşdüm. Deyirdi, Gülərdən xahiş edəcək ki, onu harasa işə düzəltsin, işsizdir. Onun Gülər xanımla münasibətindən o qədər də xəbərim yox idi”.

Daha sonra prosesdə şahid Elmin Bağırov ifadə verib. O, Sevinc Babayevanı tanıdığını deyib. Onun da ibtidai istintaqa verdiyi ifadə elan olunub. İfadəsində E. Bağırov bildirib ki, Sevinc Babayeva Gülər Əhmədova ilə münasibətinin yaxşı olduğunu deyib: “Lakin onun yaxşı adam olmadığını bildirirdi. Deyirdi ki, Gülər ondan pul alıb, lakin işi düzəltməyib. Mən fondda işləyəndə Sevinc Babayeva Gülər Əhmədovanın layihəsi ilə bağlı zəng etmişdi”.

Gülər Əhmədova isə ona müraciət edərək bildirib ki, Sevinc onun adından heç vaxt danışa bilməz: “Sevinc mənim işçim olmayıb. Mənim adımdan danışa bilməz. Layihə versəydim, bilirdim kimə vermək lazımdır. Qənirə xanımla da yaxın olmuşuq. Ən azından ona deyərdim”.

Sonra prosesdə şahid Orxan Rəsulov ifadə verib. Şahid dostunun onun telefonu vasitəsi ilə türk tanışına mesaj yazdığını deyib.

Gülər Əhmədova isə bildirib ki, istintaq pampers satanı, onu-bunu dindirib, lakin Mete Kayanı dindirməyib.

Proses günün ikinci yarısında davam etdiriləcək.

Xatırladaq ki, fəaliyyəti dayandırılmış Azərbaycan Beynəlxalq Universitetinin sabiq rektoru Elşad Abdullayevin ötən ilin sentyabrında yaydığı qalmaqallı videodan sonra Gülər Əhmədova mandatından imtina edib. Fevralın 13-də isə G. Əhmədova barəsində həbs-qətimkan tədbiri seçilib. Bundan sonra həmin müddət iki dəfə artırılıb.

G. Əhmədova Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) və 307.1-ci (ağır və ya xüsusilə ağır cinayətin hazırlanmasını və ya törədilməsini bilərək həmin cinayət barədə xəbər verməmə ) maddələri ilə təqsirləndirilir.