APA-nın məlumatına görə, ermənilərə məxsus sosial şəbəkələrdə bu yaxınlarda Ermənistanda keçirilmiş tədbirlərin birində Rusiyadan satın alınmış PUA-ların fotoları yayılıb.
Fotolardan göründüyü kimi, Ermənistan Müdafiə Nazirliyi Rusiya istehsalı olan «Ptero-E5» tipli PUA-ları istifadə edir. PUA-lar təlim zamanı enməni paraşütlə yerinə yetiriblər.
Qeyd edək ki, «Ptero» tipli PUA-lar Smolenskdə yerləşən «AFM-Servers» şirkəti tərəfindən istehsal edilir. Adıçəkilən şirkətin baş direktoru Əmir Vəliyev bir müddət əvvəl Ermənistana 2012-ci ildə «Ptero-E5» tipli PUA-ların 4 kompleksini çatdırdıqlarını bildirmişdi. O bu PUA-ların Ermənistan Fövqəladə Hallar Nazirliyinə satıldığını söyləsə də, aparatlar Müdafiə Nazirliyi tərəfindən keçirilən tədbirdə nümayiş etdirilib.
«Ptero-E5» tipli PUA-lar elektrik mühərriki ilə təchiz olunub və havada 8 saat qala bilir.