Bakı-APA. BMT Təhlükəsizlik Şurası iyunun 5-də Litvanın təşəbbüsü ilə Ukraynadakı vəziyyətlə əlaqədar növbədənkənar iclas keçirəcək. APA-nın məlumatına görə, bu barədə “RİA Novosti”yə Litvanın BMT-dəki daimi nümayəndəliyindən bildirilib.
“Litvanın sorğusu əsasında cümə günü BMT Təhlükəsizlik Şurasında Ukraynadakı vəziyyətlə əlaqədar növbədənkənar iclas keçiriləcək. İclasda ATƏT-in Ukraynadakı xüsusi monitorinq missiyasının nümayəndələri və BMT baş katibinin siyasi məsələlər üzrə müavini Cefri Feltman çıxış edəcəklər”, deyə agentliyə bildirilib.
Litvanın BMT-dəki daimi nümayəndəliyindən həmçinin bildirilib ki, iclasda BMT TŞ-nın üzvləri qarşısında ATƏT-in Ukraynadakı xüsusi monitorinq missiyası rəhbərinin müavini Aleksandr Xuqun çıxışı gözlənilir.
Brifinqin açıq formatda keçiriləcəyi qeyd olunur.