Bu barədə APA-ya Mərkəzin seysmologiya və geodinamika şöbəsinin müdiri Tahir Məmmədli bildirib. Onun sözlərinə görə, cihazların quraşdırılmasında məqsəd sürüşmə sahəsində geodinamik dəyişiklikləri daha dərindən öyrənməkdir: “Zəlzələlər sürüşmələrə təkan verə bilir. Ona görə də ərazidə baş verən dərin geodinamik dəyişiklərin analizi aparılmalıdır”.
Qeyd edək ki, sürüşmə dekabrın 1-də saat 13:00 radələrində Badamdar qəsəbəsindən 20-ci kilometrə gedən avtomobil yolunun sağ tərəfində baş verib. Badamdar yaylasının şərq yamacında sürüşmə hadisəsi qeydə alınıb. Sürüşmənin eni 180-220 metr, uzunluğu 250 metrə qədər, çatın görünən dərinliyi isə 4-5 metrə qədər olub.