Bakı. Aqşin Rafiqoğlu - APA-Economics. Əmək və Əhalinin Sosial Müdafiəsi Nazirliyinin (ƏƏSMN) “İş yerinə dair arayış” e-xidməti əhalinin getdikcə daha çox müraciət etdiyi və aktuallığı ilə seçilən e-xidmətlərdəndir.
Nazirliyin İctimaiyyətlə əlaqələr şöbəsindən “APA-Economics”ə verilən məlumata görə, ötən ay bu e-xidmətindən istifadə edənlərin sayı cari ilin yanvar ayı ilə müqayisədə 2,3 dəfə artaraq 22 856 nəfər təşkil edib. Ümumilikdə ötən ilin dekabrında istifadəyə verilən və həmin vaxtdan da əhalinin ən çox istifadə etdiyi e-xidmətlər sırasında yer alan “İş yerinə dair arayış” e-xidmətindən faydalananların sayı cari ilin 1 oktyabr tarixinə 151 764-ə çatıb.
“İş yerinə dair arayış”ın əldə edilməsi üçün “Elektron Hökumət” portalında autenfikasiyadan keçərək həmin elektron xidməti seçmək lazımdır. Bundan sonra portal tərəfindən avtomatik olaraq formalaşdırılan iş yerinə dair arayışı elektron şəkildə göndərmək və ya çap edərək aidiyyatı quruma təqdim etmək mümkündür. E-arayışların həqiqiliyi QR-kod və ştrix-kod ilə təsdiq edilir və onun mövcudluğu portaldakı xüsusi xidmət vasitəsilə yoxlanıla bilər. Bu elektron arayışlarda işəgötürən barədə məlumatlar, onun əlaqə nömrəsi, eləcə də işçinin şəxsi məlumatları, əmək müqaviləsinin bağlandığı tarix, onun müddətli və ya müddətsiz olması, arayışın etibarlılıq müddəti və s. məlumatlar əhatə olunur.
“İş yerinə dair arayış” e-xidmətinin istifadəyə verilməsi ölkəmizdə kağız formasında arayışların elektron arayışlarla əvəz olunması prosesinin sürətlənməsinə, vətəndaşların həmin arayışları aidiyyəti müəssisələrin məsul şəxslərinə müraciət etmədən rahat şəkildə əldə etmələrinə şərait yaradıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
