Bakı. Fərid Mirzəyev – APA. “Sentyabr ayında İsmayıllı rayonu Xankəndi və Şamaxı rayonu Muğanlı sürüşmə sahələrində, Muğanlı-İsmayıllı avtomobil yolunun 2-11, 23-24, 27-29-cu kilometrliklərində, Quba-Xınalıq yolunun 37-46-cı, Quba-Qonaqkənd yolunun 37-40-cı, Bakı-Ağsu yolunun 132-156 və Bakı-Şamaxı yolunun 106-111-ci kilometrliklərindəki sürüşmə sahələrinin dinamikasında aktivləşmə müşahidə olunub, mövcud çatlarda genişlənmə qeydə alınıb”.
Bunu APA-ya Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin geoloji planlama ekspedisiyasının baş geoloqu Ələmdar Piriyev deyib. O bildirib ki, nəticədə yol boyu bir neçə yerdə uçqun-töküntü hadisəsi baş verib.
Baş geoloqun sözlərinə görə, ötən ay Zığ sürüşmə sahəsində qəzalı vəziyyətə düşmüş fərdi yaşayış evlərinin divarlarında və 43 saylı binanın fasadında quraşdırılmış mayaklarda 6-20 millimetr enində çatlar əmələ gəlib: “Ayrı-ayrı lokal sahələrdə fəallaşma müşahidə olunub. Qaraçuxur sürüşmə sahəsində yerləşən qəbiristanlığın istinad divarının bəzi yerlərində çökmə prosesi baş verib. Quraşdırılmış mayaklarda 15-40 millimetr enində çatlar əmələ gəlib”.
Ə. Piriyev əlavə edib ki, Bakı şəhəri Səbail rayonu ərazisində - Bayıl və Badamdar sürüşmə sahələrində, Xətai rayonu ərazisində - Əhmədli 1, Əhmədli 2 sürüşmə sahələrində, Suraxanı rayonu Günəşli, Nərimanov dairəsindəki sürüşmə sahələrində aktivlik qeydə alınmayıb.
Baş geoloq onu da qeyd edib ki, sentyabrda Lənkəran, Lerik və Masallı rayonlarındakı sürüşmə sahələrində aktivlik baş verməyib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
