Bakı. Yeganə Laçınzadə - APA-Economics. “Bakcell” şirkəti tərəfindən “Futbol Bakcell ilə” layihəsi çərçivəsində təşkil olunan virtual futbol çempionatının final oyunları keçirilib və qaliblər müəyyən olunub.
Şirkətdən “APA-Economics”ə verilən xəbərə görə, 1-ci yerə Hacı Mirzəməmmədov, 2-ci yerə Talıb Rzayev layiq görülüb.
2015-ci ilin fevralında başlayan və Azərbaycanın 8 şəhərində 9, 10 və 11-ci sinif şagirdləri arasında keçirilən bu çempionat bu günə qədər respublika üzrə gənclərin iştirakı ilə keçirilən ən iri tədbirlərdən biri hesab olunur. 7000 nəfərə yaxın məktəblini əhatə edən bu layihənin əsas məqsədi gənclərin boş vaxtlarını daha səmərəli keçirməsi və sağlam idman rəqabətinin təşviq olunmasıdır.
2015-ci ilin fevral ayından başlayaraq Bakı, Gəncə, Sumqayıt, Lənkəran, Mingəçevir, Qəbələ, Şəki və Zaqatala şəhərlərinin hər biri üzrə qaliblərin müəyyən olunması üçün hər şəhərdə 130-dan çox oyun keçirilib. Seçimdən müvəffəqiyyətlə keçən uşaqlar arasında şənbə və bazar günləri ümumilikdə 1024 oyun təşkil olunub.
Aprelin 26-da Bakıdakı H. Cavid parkı, N.Nərimanov parkı, Səməd Vurğun bağı və Sahil bağında qurulan səyyar oyun zonalarında final oyunlar və əyləncə tədbirləri təşkil olunub. Oyunların öncədən elan olunmuş marşrut üzrə hərəkət edən və xüsusi avadanlıqla təchiz olunan avtomobil üzərində keçirilməsi və çempionatın şou şəklində təşkil olunması şəhər sakinlərində bu tədbirə xüsusi maraq oyadıb.
Çempionatda birinci yeri qazanan iştirakçı Amerika Birləşmiş Ştatlarına səfər edərək orada “Mançester Yunayted”in oyununu izləyəcək və səfər zamanı şəxsən oyunçularla virtual futbol oynamaq imkanı əldə edəcək. Yarımfinalçılar Alov smartfonları və digər müxtəlif dəyərli hədiyyələrlə təltif olunublar.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
