Rəsmi Moskva Bakı ilə İrəvan arasında normallaşma prosesini dəstəkləyir.
APA-nın Moskva bürosu xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova bu gün keçirdiyi brifinqdə bildirib.
Onun sözlərinə görə, regiona qonşu ölkələr də Azərbaycan- Ermənistan münasibətlərinin normallaşmasında maraqlıdır: “Biz əlbəttə ki, Azərbaycan-Ermənistan münasibətlərinin normallaşması prosesini alqışlayırıq və dəstəkləyirik. Bakı ilə İrəvan arasında dayanıqlı sülh bütün Cənubi Qafqazda sabitlik və çiçəklənmənin əsas faktorlarından biridir. Bunda təkcə region ölkələri deyil, həm də onların qonşuları - Rusiya, İran və Türkiyə də maraqlıdır”.
Rusiya, Azərbaycan və Ermənistan arasında imzalanan üçtərəfli bəyanatları xatırladan Zaxarova deyib ki, bu razılaşmalar əsasında Bakı ilə İrəvan arasında bir sıra sahələr üzrə qarşılıqlı əməkdaşlıqla bağlı yol xəritəsi hazırlanıb.
Rusiya XİN sözçüsü vurğulayıb ki, tərəflərdən heç biri bu razılaşmalardan öz imzasını geri çəkməyib.
“Gördüyümüz kimi, hazırda Bakı və İrəvan birbaşa dialoq aparmağa üstünlük verir. Təbii ki, biz bu qərara hörmət edirik. Bununla belə, əvvəlki kimi, tələb olunacağı təqdirdə, tərəfdaşlarımıza ən geniş spektrlı məsələlərlə bağlı yardım etməyə hazırıq”, - Zaxarova əlavə edib.