Apasport.az saytının məlumatına görə, “Bavariya” ilə “Barselona” Münhendə münasibətlərinə aydınlıq gətiriblər.
İlk oyunda rəqibini 3 cavabsız qolla məğlubiyyətə uğradan Kataloniya klubu finalın bir addımlığında idi. La Liqada da artıq çempionluğa çox yaxın olan “Barsa” ÇL-dəki üstünlüyü əldən vermədi..
Final görüşünün Berlinə salınması “Bavariya”ya əlavə stimul verə bilərdi, amma Pep Qvardiola səfərdə olduğu kimi, evdə də aparıcı oyunçuların xidmətindən məhrum idi. Söhbət Aryen Robben, Frank Riberi, David Alaba və Holqer Badştuberdən gedir. Adıçəkilən oyunçular Barselonada olduğu kimi, Münhendə də meydançaya çıxa bilmədilər. Yalnız Sebastian Rodenin iştirakı mümkün oldu.
“Barselona” isə yenə görüşə ideal heyətlə çıxmışdı. Yalnız zədəli Jeremi Matyunun oynayıb-oynamayacağı məlum deyildi ki, o, da ikinci hissədə, oyunun gedişində meydana daxil oldu.
Oyun isə olduqca sürətli başladı. İlk dəqiqələrdən üstünlüyü ələ alıb, erkən qol vurmaq istəyən almanlar bu istəklərinə də tez çatdılar. Artıq 7-ci dəqiqədə Benatia künc zərbəsindən ötürülmüş topu başla tora qovuşdurmuşdu.
Ancaq Messi, Suarez, Neymar triosu hər şeyi belə qoya bilməzdi. Çox keçmədən ard-arda iki dəfə Mesinin başladığı hücumu Suarez davam etdirib Neymara ideal ötürmə elədi, sonuncu isə fürsəti boşa vermədi.
Artıq "Bavariya"nın möcüzəyə belə ümidi qalmamışdı. Ancaq təsəlli və şərəf üçün oynamağa dəyərdi ki, almanlar da məhz bu prinsipi əldə rəhbər tutaraq sona qədər təslim olmadı.
Levandovski və Müllerin olduqca baxımlı alınan iki qolu münhenlilərə qələbə gətirdi.
Ancaq bu qələbə təsəllidən başqa heç bir işə yaramadı.
"Barselona" 2014/25 mövsümü Çempionlar Liqası turnirinin ilk finalçısıdır.
UEFA Çempionlar Liqası
Yarımfinal mərhələsi, cavab oyunu
12 may
“Bavariya” (Almaniya) – “Barselona” (İspaniya) - 3:2
Qol: Benatia, 7, Levandovski, 58, Müller, 74 - Neymar, 15, 29
Baş hakim: Mark Klattenburq (İngiltərə)
Stadion: “Alyans Arena”. Münhen
İlk oyunun nəticəsi – 0:3
“Bavariya”: Noyer, Benatiya, Rafinya, Boatenq, Bernat, Lam, Xabi Alonso, Tyaqo, Şvaynştayqer, Levandovski, Müller
Ehtiyat oyunçular: Reyna, Dante, Xavi Martines, Götse, Rode, Vayser, Pizarro
“Barselona”: Ter Ştegen, Pike, Masçerano, Xordi Alba, Dani Alves, Rakitiç, Buskets, İniesta, Suares, Messi, Neymar
Ehtiyat oyunçular: Bravo, Bartra, Adriano, Matye, Xavi, Rafinya, Pedro
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
