Hadisə

Ana səhifə

Hadisə

İlhamə Quliyevanın oğlunun həbs müddəti uzadılıb

02 avqust 2008 11:25 (UTC +04:00)

Bakı. Hacı Zeynalov - APA. Bakı şəhərinin sabiq prokuroru Ədalət Mirsalamovun oğlu Mahir Mirsalamov, Əzizbəyov rayonunun sabiq prokuroru Rəşid Həsənovun oğlu Yalçın Həsənov və xalq artisti İlhamə Quliyevanın oğlu Orxan Nadirov barəsində seçilən həbs-qətimkan tədbirinin müddəti 3 ay uzadılıb. O. Nadirovun vəkili Seyfəddin Əliyevin APA-ya verdiyi məlumata görə, bu barədə qərar avqustun 2-də Səbayel Rayon Məhkəməsində hakim Rauf Əhmədovun sədrliyi ilə keçirilən prosesdə qəbul edilib. Hakim həbs-qətimkan tədbirinin müddətinin uzadılmasını cinayət işinin ibtidai araşdırmasının başa çatmaması ilə əlaqələndirib.

Qeyd edək ki, adıçəkilən şəxslər Milli Təhlükəsizlik Nazirliyinin keçirdiyi əməliyyat nəticəsində bu ilin mayın 8-də həbs olunublar. Onlar Cinayət Məcəlləsinin 234-cü (qanunsuz olaraq narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma) maddəsi ilə ittiham olunurlar.

İlhamə_Quliyeva_Orxan_Nadirov_həbs