Hadisə

Ana səhifə

Hadisə

Azərbaycanın hüquq müdafiəçisi Qobustan həbsxanasında aclıq edən məhbuslarla görüşüb

18 avqust 2008 12:05 (UTC +04:00)

Bakı. Məhbubə Qasımbəyli-APA. İşgəncələrə Qarşı Azərbaycan Komitəsinin sədri Elçin Behbudov bu gün Qobustan həbsxanasında olub. Komitə sədri APA-ya bildirib ki, həbsxanaya ömürlük məhkumların yaxınlarının müraciəti əsasında baş çəkib. Hazırda həbsxanada 200-dən çox ömürlük məhkumun saxlandığını bildirən hüquq müdafiəçisi deyib ki, bu il ərzində orada 5 məhkum dünyasını dəyişib, onlardan 2-si intihar edib.

Komitə sədri həbsxanada saxlanılan ömürlük məhkumlar - Daxili İşlər Nazirliyinin sabiq idarə rəisi Zakir Nəsirov, Elçin Əmiraslanov, Fərrux Kərimov, Dəyanət Kərimov, İmran Cənnətov və Vüqar Əliyevlə görüşdüyünü deyib. Onun sözlərinə görə, Zakir Nəsirov özünü müqəssir saymadığını, Dəyanət Kərimov isə əsəb xəstəliyindən əziyyət çəkdiyini bildirib. E. Behbudov qeyd edib ki, E. Əmiraslanov və F. Kərimov ona avqustun 12-dən aclıq aksiyasına başladıqlarını deyiblər: “Həbsxana rəhbərliyi isə onların qida qəbul etdiklərini söylədi. Elçin Əmiraslanovun kamera yoldaşı Fərrux Kərimov isə qoluna qandal vurulmasına etiraz əlaməti olaraq avqustun 15-də intihara cəhd etdiyini dedi. Amma həbsxana nəzarətçiləri bunun qarşısını alıblar”.

E. Əmiraslanov komitə sədrinə ona həbsxanada zor tətbiq olunduğunu bildirsə də, həbsxana rəhbərliyi məhkumlara yalnız kameradan çıxarılan zaman qandal vurulduğunu və bunun qanunvericiliyə uyğun olaraq həyata keçirildiyini açıqlayıb: “Həbsxana rəhbərliyi bildirdi ki, bəzi məhbusların nəzarətçilərə xəsarət yetirmə təhlükəsi olduğundan, kameradan çıxaran zaman o şəxslərin əllərinə qandal vurulur. Rəis müavini Azər Musayev mənə bildirdi ki, məhkumlardan birini kameradan çıxan zaman onu təpiklə vurub. Ona görə də bu cür hərəkət edən məhkumların qollarına qandal vurulur”.

Qobustan həbsxanasında məhkumlarla rəhbərlik, nəzarətçilər arasında problemlərin olduğunu bildirən hüquq müdafiəçisi yaranmış vəziyyətlə bağlı bu gün ədliyyə nazirinin müavini, Penitensiar Xidmətin rəisi Nazim Ələkbərova müraciət edəcəyini söyləyib: “Mən mövcud çatışmazlıqları həbsxana rəhbərliyinin də nəzərinə çatdırdım”.

Qobustan_həbsxana