Hadisə

Ana səhifə

Hadisə

Təqsirləndirilən şəxs: “İlhamə Quliyevanın oğlu Yalçın Həsənovun ofisində fəhlə işləyirdi”

27 noyabr 2008 11:14 (UTC +04:00)

Bakı. Hafiz Heydərov - APA. Bu gün Ağır Cinayətlərə dair İşlər üzrə Məhkəmədə xalq artisti İlhamə Quliyevanın oğlu Orxan Nadirov, Bakı şəhərinin sabiq prokuroru Ədalət Mirsalamovun oğlu Mahir Mirsalamov, Əzizbəyov rayonunun sabiq prokuroru Rəşid Həsənovun oğlu Yalçın Həsənov və daha 11 nəfərin cinayət işi üzrə məhkəmə prosesi davam etdirilib. APA-nın məlumatına görə, hakim Azər Orucovun sədrliyi ilə keçirilən məhkəmə prosesində təqsirləndirilən şəxslər ifadə veriblər. Təqsirləndirilən Ruslan Rüstəmov özünü ittiham aktına görə təqsirli bilmədiyini deyib. O “ekstazi işi”ndə bilmədən vasitəçilik etdiyini bildirib. Mahir Mirsalamovdan aldığı 50 ədəd həbi Cavid adlı şəxsə çatdırdığını bildirən R. Rüstəmov sonuncu dəfə Cavidə 100 həb aparan zaman Milli Təhlükəsizlik Nazirliyinin (MTN) əməkdaşları tərəfindən tutulduğunu deyib. Digər təqsirləndirilən şəxs - Yalçın Həsənovun sürücüsü Həsən Həsənov isə ifadəsində özünü qismən təqsirli bildiyini açıqlayıb. H. Həsənov MTN-də ondan fiziki təzyiqlərlə ifadə alındığını deyib. O, Gürcüstan-Azərbaycan sərhədini keçəndən sonra Azərbaycan tərəfdə Gürcüstan vətəndaşından aldığı 1000 ədəd narkotik həbin 375-ni Yalçın Həsənova, qalanlarını isə Mahir Mirsalamova verdiyini də qeyd edib. M. Mirsalamov isə buna etiraz edərək ondan heç bir həb almadığını bildirib. H. Həsənov ifadəsində əməlindən peşman olduğunu da deyib.

O, hakimin sualına cavab olaraq Orxan Nadirovun Yalçın Həsənovun ofisində fəhlə işlədiyini, orada təmir işləri apardığını söyləyib.

Proses gününü ikinci yarısında davam etdiriləcək.

Qeyd edək ki, adıçəkilən şəxslər narkotik vasitələrin qanunsuz dövriyyəsi və istifadəsində ittiham olunurlar. İttiham aktına əsasən onlar Cinayət Məcəlləsinin 206-cı (qaçaqmalçılıq), 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) və 234.4.1-ci (qabaqcadan əlbir olan bir qrup şəxs tərəfindən və ya mütəşəkkil dəstə tərəfindən qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə ittiham olunurlar. Təqsirləndirilən şəxslər bu ilin mayında Milli Təhlükəsizlik Nazirliyinin keçirdiyi əməliyyat nəticəsində həbs ediliblər.