Hadisə

Ana səhifə

Hadisə

Bakıda xeyli miqdarda heroini 25 min ABŞ dollarına satmaq istəyən Yardımlı sakinləri həbs edilib

06 yanvar 2009 16:15 (UTC +04:00)

Bakı. Hafiz Heydərov –APA. Azərbaycan paytaxtında xeyli miqdarda heroini 25 min ABŞ dollarına satmaq istəyən Yardımlı rayon sakinləri həbs edilib. Bakı şəhər Baş Polis İdarəsindən APA-ya verilən məlumata görə, Yardımlı rayon sakini, 1979-cu il təvəllüdlü Azər Almirzə oğlu İnniyev yanvarın 2-də Azərbaycan-İran sərhədində tanımadığı İran vərəndaşından ümumi çəkisi 2 kiloqram 55.839 qram olan heroini 12 min ABŞ dollarına alıb. A. İnniyev əldə etdiyi narkotik vasitəni satmaq məqsədi ilə Bakı şəhərinə gərtirib. A. İnniyev Bakıda olan həmyerlisi, 1983-cü il təvəllüdlü Elşən Xudaverdiyevin vasitəsi ilə heroini tanımadıqları paytaxt sakininə satmaq qərarına gəlib. Binəqədi rayon Polis İdarəsinin 7-ci Polis Bölməsi əməkdaşlarının keçirdiyi əməliyyat tədbirləri nəticəsində adıçəkilən şəxslər 2 kiloqramdan çox heroini 25 min ABŞ dollarına şərti alıcıya satmaq istəyərkən həbs ediliblər. Faktla bağlı Binəqədi rayon Polis İdarəsinin istintaq şöbəsində Cinayət Məcəlləsinin 234.4.3-cü (qanunsuz olaraq külli miqdarda narkotik vasitələri əldə etmə, saxlama və ya satma) maddəsi ilə cinayət işi başlanılıb, araşdırma aparılır.