Hadisə

Ana səhifə

Hadisə

Azərbaycan paytaxtının Binəqədi rayonu ərazisində yaşayış evində güclü partlayış baş verib, xəsarət alanlar var

08 yanvar 2009 08:51 (UTC +04:00)

Bu barədə APA-ya Binəqədi Rayon Polis İdarəsinin 4-cü Polis Bölməsindən bildirilib. Hadisə Binəqədi rayon Binəqədi qəsəbəsi, 1-ci Mədən küçəsi, 10-cu korpus, ev 16-da qaz sızması nəticəsində baş verib. Yanvarın 8-i səhər saatlarında baş verən partlayış nəticəsində dağıntılar altında qalan beş nəfər müxtəlif dərəcəli bədən xəsarətləri alıb. Onların hamısı dağıntılar altından çıxarılıb.

Polis bölməsindən bildirilib ki, yaralananlar ev sahibi, 1952-ci il təvəllüdlü Mikayıl Hüseynov, onun həyat yoldaşı, 1953-cü il təvəllüdlü Zərifə Hüseynova, ev sahibinin qızı, 1979-cu il təvəllüdlü Elnarə Hüseynova, M. Hüseynovun kürəkəni, 1978-ci il təvəllüdlü Ziya Həsənzadə və Z. Həsənzadənin həyat yoldaşı Ləman Həsənzadədir.

Yaralılardan Z. Həsənzadə Kliniki Tibbi Mərkəzin reanimasiya şöbəsinə yerləşdirilib. Mərkəzdən APA-ya bildirilib ki, onun vəziyyəti ağırdır.

M. Hüseynov və həyat yoldaşı 5 saylı Şəhər Klinik Xəstəxanasının yanıq şöbəsinə yerləşdirilib, digər iki nəfərin xəsarətləri yüngül olduğundan onlar həkim müdaxiləsindən sonra evə buraxılıblar.

Binəqədi_partlayış