Hadisə

Ana səhifə

Hadisə

Qəzzada yaşayan Azərbaycan vətəndaşı: “Qızım İsrailin raket zərbələrindən uçmuş məktəbin dağıntıları altında qalmışdı” - EKSKLÜZİV

Qəzzada yaşayan Azərbaycan vətəndaşı: “Qızım İsrailin raket zərbələrindən uçmuş məktəbin dağıntıları altında qalmışdı” - <font color=red>EKSKLÜZİV </font>

22 yanvar 2009 12:32 (UTC +04:00)

İsrail Qəzza zolağında hərbi əməliyyat başlayan zaman uşaqları ilə birlikdə evdə olduğunu deyən qadın dəhşətli günlər keçirdiyini bildirib: “Ərim başqa ölkədə müalicə olunur. O altı ay idi ki, evdə yox idi və Qəzzada bütün bu dəhşəti uşaqlarımla birlikdə tək yaşadım. HAMAS hərəkatı hakimiyyətə gəldikdən sonra banklarda hesablarımız dondurulub. Ona görə də maaş, ərzaq, meyvə və başqa zəruri şeylər ala bilmirik”.

Səbinə Şanaa Qəzza zolağında hələ də Azərbaycan vətəndaşlarının qaldığını deyib: “Orada daha üç azərbaycanlı qadını – Dinarə, Səadət və Nailəni tanıyıram. Səadətin üç uşağı var, o həm də hamilədir. Ərinin Azərbaycan vətəndaşlığı olmadığı üçün o, Qəzza zolağını tərk eləmək istəmədi. Qadınlarımız ərlərini qoyub gəlmək istəmirlər”. Səbinə Şanaa müharibənin dəhşətlərini belə xatırlayır: “Nə qaz, nə işıq, nə də su vardı. Hər gün bombardmanlardan qorunmaq üçün birinci mərtəbədə gizlənməli olurduq. Gördüyüm mənzərələr mənim və övladlarımın gözü qarşısından bu gün də çəkilmir. Əməliyyatın birinci günü İsrail təyyarələri övladlarımın təhsil aldığı məktəbi bombaladılar. Qızım dağıntılar altında qalıb, onu çıxaran zaman çoxlu sayda qan işində qışqıran yaralıları, başsız, qolsuz, ayaqsız bədənləri görüb. Bundan sonra qızımın qorxudan ürəyi gedib və onu xəstəxanaya aparıblar. Artıq həmin xəstəxanada yoxdur, İsrail aviasiyası oranı da bombardman elədi. Mən isə yerimdən tərpənə bilmirdim. Məktəb evimizin yaxınlığında idi, amma bombardmanlar qaçaraq məktəbə gedib, uşaqlarımı götürməyə imkan vermirdi”.

Səbinə Şanaa Qəzza zolağını Rusiya və Ukrayna Fövqəladə Hallar Nazirliyinin əməkdaşlarının köməyi ilə tərk etdiyini bildirib: “Mən Qəzzanı tərk etməkdə əvəzsiz kömək etdiyinə görə Rusiya konsulu Yevgeni Nikolayeviçə, Azərbaycanın Misirdəki səfirliyinə və xüsusilə konsul Vüqar Yusifova təşəkkür etmək istəyirəm. Misirdən Azərbaycana məhz onun köməyi ilə gələ bildik. Əvvəlcə Həştərxana getmək istəyirdim, böyük qardaşım və bacım orada yaşayır. Bakıda mənim heç kimim qalmayıb. Lakin Azərbaycan vətəndaşı kimi məni Bakıya göndərdilər. İndi Bakıda başqasının mənzilində qalmaq məcburiyyətindəyəm. Sonra nə olacağını bilmirəm, əsas odur ki, Qəzzadan sağ-salamat çıxa bildik”. Səbinə Şanaa Qəzza zolağına qayıtmaq fikrində olmadığını deyib. Soydaşımız bəzi mülahizələr səbəbilə özünün və övladlarının fotolarının çəkilməsini istəməyib.