Hadisə

Ana səhifə

Hadisə

“Azərfon” ölkə ərazisinin 80%-ni əhatə edəcək

26 dekabr 2006 16:54 (UTC +04:00)

“Azərfon” 2007-ci ilin fevralında hazırlıq işlərini başa çatdıracaq və abunəçilərə yeni növ xidmətlər təqdim edəcək. APA-nın məlumatına görə, bunu tədbirdə çıxış edən şirkətin prezidenti Con Armli bildirib. “Azərfon”un gələn il ölkə ərazisinin 80%-ni əhatə edəcəyini deyən C. Armlinin sözlərinə görə, indiyədək şirkətə 180 işçi qəbul olunub və gələcəkdə daha 500 işçinin qəbulu nəzərdə tutulur: “Artıq şirkətin marketinq paketini hazırlamışıq. Paketin hazırlığı tamamlanmaq üzrədir. Fəaliyyətə başlayan kimi, şəbəkənin gücünü artıracağıq”. C. Armli qeyd edib ki, “Azərfon”un brendi “Nar Mobile” olacaq.
Şirkətin kommersiya direktoru Meloş Surla isə xidmətlər barədə məlumat verib. Onun sözlərinə görə, abunəçilər xidmətləri özləri telefona əlavə edə və ya çıxara biləcəklər: “Xidmətlərimiz pullu olacaq. Düzdür, təqdim etdiyimiz xidmətlər hazırda bazarda mövcuddur. Amma biz bunu təkmilləşdirilmiş formada təqdim edirik”. M. Surla deyib ki, ilkin mərhələdə “Azərfon” abunəçilərinə “Səsli xidmət” və “Xəbərdar ol” xidmətlərini təklif edəcək. Bundan başqa, “Azərfon” abunəçiləri telefonlarında televiziya kanallarına da baxmaq imkanı qazanacaqlar. Şirkət rəsmiləri tariflər barədə açıqlama verməyiblər. /APA/