Hadisə

Ana səhifə

Hadisə

ANS-in apellyasiya şikayəti üzrə məhkəmə icraatı təzələnib

31 yanvar 2007 14:40 (UTC +04:00)

ANS Şirkətlər Qrupunun 1 saylı İqtisad Məhkəməsinin “ANS-Commerce”-lə bağlı qətnaməsindən verilən apellyasiya şikayəti üzrə məhkəmə icraatı təzələnib. Bu barədə APA-ya məhkəmədən məlumat verilib. Məhkəmədən bildirilib ki, iş üzrə yeni hallar aşkarlandığından növbəti məhkəmə prosesi fevralın 5-ə təxirə salınıb. Qeyd edək ki, ötən ilin avqust-sentyabr aylarında Vergilər Nazirliyi “ANS-Commerce”-də yoxlamalar aparıb. Yoxlamalardan sonra nazirlik ilkin olaraq vergidən yayınmaya görə, ANS Şirkətlər Qrupuna 31 min AZN məbləğində cərimə tətbiq edib. Bundan razı qalmayan ANS Şirkətlər Qrupu Vergilər Nazirliyinin qərarından 1 saylı İqtisad Məhkəməsinə iddia ərizəsi ilə müraciət edib. Hakim Maşallah Əhmədovun sədrliyi ilə keçirilən iclasda ANS Şirkətlər Qrupunun nümayəndələri beynəlxalq auditor təşkilatının və yerli auditorların “ANS-Commerce”də apardığı yoxlamaların nəticələrinin rəylərini məhkəməyə təqdim edib və bu rəylərin Vergilər Nazirliyinin auditorlarının rəyləri ilə uyğun gəlmədiyini sübut etməyə çalışıb. Sənədlər ekspertiza üçün Ədliyyə Nazirliyi Elmi-Tədqiqat Məhkəmə Ekspertizası Kriminalistika və Kriminologiya Problemləri İnstitutuna təqdim edilsə də, məhkəmə ANS Şirkətlər Qrupunun iddiasını əsassız sayıb. /APA/