Hadisə

Ana səhifə

Hadisə

MTN “İran- Azərbaycan- Rusiya” marşrutu üzrə narkotik maddələrin qanunsuz dövriyyəsi ilə məşğul olan mütəşəkkil cinayətkar dəstəni zərərsizləşdirib

01 mart 2007 12:53 (UTC +04:00)

MTN ictimai əlaqələr mərkəzindən APA-ya verilən məlumata görə, narkotik vasitələrin qanunsuz dövriyyəsinə qarşı keçirilən əməliyyat nəticəsində qaçaqmalçılıq yolu ilə narkotik vasitələrin daşınması ilə məşğul olan mütəşəkkil dəstədən 60 kq 287,7 qram həşiş götürülüb. Belə ki, Cəlilabad rayon sakinləri - 1955-ci il təvəllüdlü Vəzirov Mirxalıq Xudaqulu oğlu, onun oğlu, 1980-ci il təvəllüdlü Elnur Vəzirov, 1970-ci il təvəllüdlü Qürbətov Asif Davaxan oğlu, “Yaşılxan” ləqəbi ilə tanınan, 1973-cü il təvəllüdlü Ağayev Polad Məmmədəli oğlu, hazırda şəxsiyyətləri istintaqla müəyyənləşdirilən Məmməd, Şahzad adlı İran vətəndaşları və qeyriləri qabaqcadan əlbir olub, cinayət əlaqəsinə girərək, külli miqdarda narkotik vasitəni satış üçün qaçaqmalçılıq yolu ilə İrandan Azərbaycana gətiriblər. Məlum olub ki, Məmməd və Mirxalıq Vəzirov 2007-ci ilin yanvarında Cəlilabad şəhərində külli miqdarda narkotik vasitəni qaçaqmalçılıq yolu ilə İrandan Azərbaycana gətirib satmaq barədə sövdələşiblər. Əldə olunmuş razılığa əsasən, M. Vəzirov narkotik vasitəni qəbul etməyi, evində saxlamağı və sonradan həmin narkotikləri satmaq üçün Rusiyaya aparacaq Asif Qürbətova təhvil verməyi öhdəsinə götürüb. M. Vəzirov cinayətkar niyyətinin həyata keçirilməsində kömək və iştirak üçün oğlu Elnuru da cəlb edib. Məmmədin tapşırığı ilə Şahzad qaçaqmalçılıq yolu ilə İrandan Azərbaycana gətiriləcək həmin narkotik vasitəni satmaqda ona köməklik etmək barədə tanışı Polad Ağayevlə razılığa gəlib. P. Ağayev Şahzaddan götürəcəyi 60 kq 287,7 qram çəkidə olan həşişi 5000 ABŞ dolları müqabilində Cəlilabad rayonunun Cəfərli kəndi yaxınlığında qəbul edib, Cəlilabad şəhərində Mirxalıq və Elnur Vəzirovlara çatdırmağı vəd edib. Əldə olunmuş razılığa əsasən, bu il fevralın 24-də saat 23.00 radələrində Şahzad həmin narkotik vasitəni Azərbaycanın gömrük sərhədindən gömrük nəzarətindən kənarda - dövlət sərhədinin Cəfərli kəndi istiqamətindən keçirib buradakı qəbiristanlığın yaxınlığında P. Ağayevə verib. P. Ağayev narkotikləri atla Cəlilabad şəhərinə gətirib, təhvil vermək üçün Mirxalıq və Elnur Vəzirovlara zəng edib. Mirxalıq və Elnur Vəzirovlar təyin olunmuş yerə gəlib narkotik vasitəni qəbul edərkən ətrafda hərəkət edən maşınlarından şübhələndiklərindən maddəni P. Ağayevə qaytarıblar, növbəti gün götürmək barədə razılaşıblar. M. Vəzirov dərhal A. Qürbətovla görüşüb ona həmin narkotik vasitəni P. Ağayevdən qəbul edə bilmədiyini deyib. Fevralın 25-də saat 05.00 radələrində P. Ağayev narkotik vasitəni Uzuntəpə kəndindəki evinə gətirərək, həyətindəki ot bağlamalarının arasında gizlədib və həşişi hələlik təhvil verə bilmədiyi barədə Məmmədi məlumatlandırıb. Sonuncu A. Qürbətova göndərdiyi həşişi P. Ağayevdən özünün birbaşa qəbul etməsini tapşırıb. Bundan sonra Məmmədin tapşırığı ilə P. Ağayev A. Qürbətovla telefon əlaqəsi saxlayıb, sonuncu həşişin qəbul edilməsi ilə bağlı məsələləri razılaşdırmaq üçün fevralın 25-də Cəlilabad şəhərindəki Mədəniyyət evinin qarşısında görüşməyi təklif edib. MTN əməkdaşları həmin gün P. Ağayevin Uzuntəpə kəndindəki evinə baxış keçiriblər və həyətindəki ot bağlamalarının arasında gizlədilmiş ümumi xalis çəkisi 60 kq 287,7 qram olan həşiş aşkar ediblər.
Faktla bağlı Cinayət Məcəlləsinin 206.3.2-ci (qabaqcadan əlibir olan bir qrup şəxs tərəfindən narkotik vasitələrin qaçaqmalçılığı), 234.4.1 və 234.4.3-cü (qabaqcadan əlibir olan bir qrup şəxs tərəfindən satış məqsədi ilə qanunsuz olaraq külli miqdarda narkotik vasitələri əldə etmə, saxlama, daşıma, göndərmə və satma) maddələri ilə cinayət işi başlanıb, Mirxalıq və Elnur Vəzirovlar, Polad Ağayev və Asif Qürbətov təqsirləndirilən şəxs qismində cəlb olunublar. Onlar barəsində məhkəmənin qərarı ilə həbs qətimkan tədbiri seçilib. /APA/