Hadisə

Ana səhifə

Hadisə

2001-ci ilin sentyabrından indiyədək Azərbaycanda baş vermiş mina hadisələrində 53 nəfər həlak olub, 122 nəfər yaralanıb

04 aprel 2007 11:58 (UTC +04:00)

2007-cı ilin mart ayı ərzində Azərbaycanın 1 249 801 kv/m ərazisi Ərazilərin Minalardan Təmizlənməsi üzrə Milli Agentlik (ANAMA) tərəfindən yoxlanılıb, mina və partlamamış hərbi sursatdan (PHS) təmizlənib. ANAMA-nın mətbuat xidmətindən APA-ya verilən məlumata görə, ötən ay 27 848 PHS və mina aşkar edilərək zərərsizləşdirilib.
İndiyədək Azərbaycanın cəmi 46 596 766 kv/m ərazisi təmizlənib, tapılıb zərərsizləşdirilən mina və PHS-lərin sayı isə 167 060-dir.
Bu ilin mart ayı ərzində ölkədə 3 mina/PHS hadisəsi qeydə alınıb. İsmayıllı rayon Hərbi Komissarlığından həqiqi hərbi xidmətə çağırılmış, 20 yaşlı sıravi əsgər Mail Tahir oğlu Hacıyev və Bakı şəhər Əzizbəyov rayon Hərbi Komissarlığından hərbi xidmətə çağırılmış, 1987-ci il təvəllüdlü Mübariz İbadət oğlu Kamilov martın 24-də Naxçıvan MR Sədərək rayonunun Ermənistanla sərhədinin 3 kilometrliyində xidmətlə bağlı tapşırığı yerinə yetirərkən, tank əleyhinə minaya düşərək həlak olub.
31 mart 2007-ci ildə isə Füzuli rayon Böyük Bəhmənli kəndinin sakini, 1993-cü il təvəllüdlü Şükürov Sərxan Qaraxan oğlu kəndin kənarında otlaq sahəsində tank əleyhinə minanın döyüş başlığını tapıb. O, başlığı əlinə götürüb baxdıqdan sonra yerə atanda partlayış baş verib və yeniyetmə ayaq, əl, üz nahiyələrindən müxtəlif dərəcəli xəsarətlər alıb.
Qeyd edək ki, 2001-ci ilin sentyabrından başlayaraq müxtəlif mənbələrə istinadən aparılan statistikaya görə Azərbaycan ərazisində baş vermiş 86 mina hadisəsində 53 nəfər həlak olub, 122 nəfər müxtəlif dərəcəli xəsarət alıb. /APA/