Hadisə

Ana səhifə

Hadisə

Aclıq aksiyası keçirən zabit tələblərinə məhəl qoyulmadığını bildirir

23 aprel 2007 15:10 (UTC +04:00)

Hüquqlarının bərpası tələbi ilə martın 28-dən aclıq aksiyasına başlayan Azərbaycan Silahlı Qüvvələrinin zabiti, Müdafiə Nazirliyi mühafizə briqadasının keçmiş komandir müavini Rasim Muradov tələbləri yerinə yetirilməyənə qədər aclıq aksiyasını davam etdirəcək. Bu barədə APA-ya Rasim Muradovun özü məlumat verib. O bildirib ki, yuxarı komandanlığa etdiyi müraciətlər cavabsız qalıb, Müdafiə Nazirliyinin rəhbərliyi isə onun aclıq aksiyası keçirməsinə məhəl qoymur. R. Muradov səhhətində yaranan problem səbəbindən xidməti yerinə gedə bilmədiyini də deyib: “Həyat yoldaşım və böyük uşağım sarılıq xəstəliyinə tutulub. Məzuniyyətlə bağlı müraciətim də cavabsız qalıb”. Müdafiə Nazirliyinin mətbuat xidmətinin əməkdaşı İlqar Verdiyev isə bildirib ki, R. Muradov hərbi qulluqçu olduğundan onun aclıq aksiyası keçirməsinə qanun yol vermir. O, R. Muradovun nizamnamə çərçivəsində cəzalandırılacağını da deyib: “Hələlik isə onun barəsində komandanlıq tərəfindən hansı qərarın çıxarılacağı haqda məlumatım yoxdur”. /APA/