Hadisə

Ana səhifə

Hadisə

Kitab Günü, Ümumdünya Müəlliflik Günü və Əqli Mülkiyyət Günü qeyd olunub

24 aprel 2007 16:39 (UTC +04:00)

Bu gün Müəllif Hüquqları Agentliyi 23 aprel Kitab Günü və Ümumdünya Müəlliflik Günü, həmçinin 26 aprel Əqli Mülkiyyət Gününə həsr olunmuş tədbir keçirib. APA-nın məlumatına görə, tədbiri giriş sözü ilə agentliyin sədri Abutalıb Səmədov açıb. Sonra bir qrup müəllifə müəlliflik şəhadətnaməsi təqdim olunub. Şair Baba Vəziroğlu və Kamal “Xalq Heydər söyləyəcək” mahnısına görə, şair Vahid Əziz bədii əsərlərinə görə, xalq artisti Amalya Pənahova “Yaratdığım obrazların ikinci planı” monoqrafiyasına görə, telejurnalist Qulu Məhərrəmli televerilişlərinə görə, əməkdar artist Tünzalə Ağayeva “Oxu” musiqi əsərinə görə, dramaturq Əli Əmirli “Ağa Məhəmməd Şah Qacar” pyesinə görə, Baba Vəziroğlu və bəstəkar Faiq Sücəddinov “Azərbaycan” mahnısına görə müəlliflik hüququ qazanıblar. Təqdimat mərasimindən sonra agentliyin yeniləşən internet saytı haqda geniş məlumat verilib. Artıq 4 gündür fəaliyyət göstərən agentliyin saytı üç dildə tərtib olunacaq. /APA/