Hadisə

Ana səhifə

Hadisə

Tiflisdə “Sivilizasiyalararası qloballaşma və dialoq” mövzusunda beynəlxalq konfrans başlayıb

24 may 2007 10:39 (UTC +04:00)

APA-nın tədbirdə iştirak edən əməkdaşının verdiyi məlumata görə, Gürcüstan prezidentinin himayədarlığı ilə keçirilən konfrans Gürcüstanın Təhsil, Xarici İşlər, Mədəniyyət və İdman nazirlikləri, Beynəlxalq Təhsilə Dəstək və İş Həyatı Dayanışma Fondu, Gürcüstan prezidenti Mixail Saakaşvilinin anası, “Gürcüstan-Azərbaycan Dostluq Evi”nin sədri Giuli Alasaniyanın rəhbərlik etdiyi Avrasiya Dialoqu Platforması Təşkilatının Gürcüstan Milli Komitəsi tərəfindən təşkil olunub. Konfransda Azərbaycan, Türkiyə, İtaliya, Rusiya, Fransa, Almaniya, Polşa, BƏƏ, ABŞ, Rumıniya, Avstriya, Qazaxıstan və digər ölkələrin nümayəndələri iştirak edir. Ermənistan isə tədbirə qatılmayıb.
Tədbirdə Gürcüstan prezidenti Mixail Saakaşvili giriş nitqi ilə çıxış edib. Gürcüstanın iqtisadi inkişafından söz açan M. Saakaşvilinin sözlərinə görə, 3-4 il əvvəl Gürcüstanda iqtisadi vəziyyət çox pis olub: “Ölkənin 80 faizi elektrik enerjisi ilə təmin olunmurdu. Artıq bu problem aradan qalxıb. 2002-ci ildə Gürcüstan yoxsul ölkələrin siyahısında idisə, indi sürətlə dəyişən ölkələrdən biridir. Ölkəmizə sərmayə qoyuluşunun həcmi artıb, yolların təmiri və nəqliyyat təhlükəsizliyi təmin olunub”. Mədəniyyətlərarası dialoqa toxunan M. Saakaşvili Gürcüstanda etnik rəngarəngliyin olduğunu, azərbaycanlılarla gürcülərin sülh şəraitində yaşadığını vurğulayıb: “Məndən əvvəlki hökumət və mənim müxalifətim mənə və Zurab Jvaniyaya erməni deyirdi. Halbuki mən təmiz gürcüyəm. Onlara belə cavab verdim ki, əgər siz ermənilərə nifrət edirsinizsə, mən erməniyəm, əgər azərbaycanlılara nifrət edirsinizsə, mən azərbaycanlıyam, əgər yəhudilərə nifrət edirsinizsə, mən yəhudiyəm”. Gürcüstan prezidenti ölkəsində etnik ayrı-seçkiliyin olmadığını bəyan edib: “Marneulidə Beynəlxalq Universitetdə gürcü dili kursları açılıb. Mənim üçün xoşdur ki, hər gün azərbaycanlılar və ermənilər Gürcüstan bayrağını qaldırıb, Gürcüstan marşını oxuyur, dərslərə hər gün belə başlayırlar”. M. Saakaşvili Gürcüstanda dini tolerantlığın mövcudluğuna da diqqət çəkib: “Mən tolerantlığın inkişafına xüsusi önəm verirəm. Gürcüstan ortodoks kilsəsi ölkənin inkişafında və tolerantlığın qorunmasında çox böyük rol oynayır. Buna görə II İlyaya təşəkkür edirəm. Tbilisi kilsə, sinaqoq və məscidin birləşdiyi bir yerdir”.
Daha sonra konfransda Bütün Gürcüstanın patriarxı II İlya çıxış edib. O, dinlərarası dialoqun vacibliyindən danışaraq bildirib ki, mədəniyyətlərarası dialoq həm də dinlərarası dialoq deməkdir: “Artıq heç bir xalq və heç bir ölkə qloballaşmadan yayına bilməz. Ancaq qloballaşma xalqların, dövlətlərin milli ruhuna toxunmamalıdır”.
Tədbirdə Azərbaycandan millət vəkili Qənirə Paşayeva, APA İnformasiya Agentliyinin baş redaktoru Vüsalə Mahirqızı və “Azad Azərbaycan” televiziyasının redaktoru Etibar Məmmədovun çıxışı gözlənilir. /APA/