Hadisə

Ana səhifə

Hadisə

Ceyhun Hacıbəyli küçəsi 52 ünvanında yaşayan sakinlərin şikayətinə məhəl qoyulmur

11 iyun 2007 12:40 (UTC +04:00)

Nərimanov rayonu, Ceyhun Hacıbəyli küçəsi 52 ünvanında yaşayan sakinlərin tələbi yerinə yetirilməyib. C. Hacıbəyli 52-nin sakini Ənnağı Tağıyev APA-ya açıqlamasında bildirib ki, Bakı şəhər İcra Hakimiyyətinin Şəhərsalma və Arxitektura İdarəsinin rəhbəri Akif Abdullayev binanın qarşısında tikilən villanın söküləcəyini desə də, bununla bağlı heç bir addım atılmayıb. Onun sözlərinə görə, A. Abdullayev bir neçə gün əvvəl keçirilən görüşdə iki gün müddətində villanın sökülməsinə başlanacağını söyləyib: “Amma onun dediyinin əksinə olaraq bizim şikayətimizdən sonra villanın hasaranın çəkilməsinə başlayıblar. Əgər bu şəkildə davam etsə, biz Prezident Aparatının qarşısında aksiya keçirəcəyik. Çünki iki dəfə Bakı şəhər İcra Hakimiyyətində olmuşuq, amma hər ikisində bizi aldadıblar”. Ə. Tağıyev Nərimanov rayon Məhkəməsinə müraciət etdiklərini də bildirib.
Qeyd edək ki, Nərimanov rayonu, C. Hacıbəyli 52 ünvanında yaşayan sakinlər bir neçə gün əvvəl binanın ərazisində villanın tikintisinə etiraz olaraq Bakı şəhər İH-nin qarşısında aksiya keçiriblər. Onlar villanın tikilməsi üçün sərəncamın C. Hacıbəyli 56-58-ə verildiyini, tikintinin isə C. Hacıbəyli 52-də aparıldığını deyiblər. Sakinlər hazırda tikinti gedən ərazisinin yaşadıqları binaya aid olduğunu iddia edirlər. /APA/