Hadisə

Ana səhifə

Hadisə

Baş Prokurorluq “Neapol” otelinə məxsus binanın tikintisi zamanı baş verən qəza ilə bağlı açıqlama yayıb

22 avqust 2007 09:59 (UTC +04:00)

Hadisə nəticəsində fəhlələr Məmmədov Rafiq Əli oğlu və Abdullayev Rauf Bəhmən oğlu həlak olub, Şərifov Sərdar Zəki oğlu, Məmmədov Rasim Məzahim oğlu, Əliyev Vüsal Zakir oğlu və Bayramov Qvadim Səttar oğlu müxtəlif dərəcəli bədən xəsarətləri alıb. Baş Prokurorluqdan APA-ya verilən məlumata görə, prokurorluğun əməkdaşları, Fövqəladə Hallar Nazirliyinin, Əmək və Əhalinin Sosial Müdafiəsi Nazirliyi Əmək Müfəttişliyinin nümayəndələri hadisə yerində olub, mütəxəssislərin iştirakı ilə araşdırma aparılıb, qəzanın nəticələrinin aradan qaldırılması üçün təxirəsalınmaz tədbirlər görülüb. Faktla bağlı avqustun 14-də Abşeron Rayon Prokurorluğunda Azərbaycan Respublikası Cinayət Məcəlləsinin 222.2-ci maddəsinin (ehtiyatsızlıqdan zərər çəkmiş şəxsin ölümünə və ya digər ağır nəticələrə səbəb olan tikinti işlərinin aparılmasının təhlükəsizlik qaydalarını pozma) əlamətləri ilə cinayət işi başlanıb.
İstintaq zamanı müəyyən edilib ki, həmin ünvanda Abşeron Rayon İcra Hakimiyyətinin 2007-ci il 29 mart tarixli sərəncamı ilə fiziki şəxs Əhmədov Şükür Nazim oğluna ayrılan torpaq sahəsində ikimərtəbəli ticarət obyektinin tikintisinə icazə verilib və sonuncuya həmin sərəncamla obyektinin layihə-smeta sənədlərinin müvafiq aidiyyəti orqanlarla razılaşdırılması, eləcə də tikinti-quraşdırma işlərinin Azərbaycan Respublikasının müvafiq qanunlarına və normativ sənədlərinə uyğun aparılması həvalə edilib. Amma Ş. Əhmədov qanunun tələblərini kobud şəkildə pozaraq ticarət obyektinin işçi layihəsini müvafiq qaydada Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin Dövlət Baş Ekspertiza İdarəsi ilə razılaşdırılıb rəy almadan, qanunvericiliklə nəzərdə tutulduğu qaydada tikintiyə cəlb etdiyi fəhlələrin sağlam və təhlükəsiz əmək şəraitini təmin etməli olduğu halda, onlarla əmək müqavilələri bağlamadan, texniki təhlükəsizlik qaydalarına dair təlimatlar keçmədən və xüsusi qoruyucu vasitələrlə təchiz etmədən inşaat işlərinə başlayıb. Tikintinin maliyyələşdirilməsi və ona rəhbərlik edilməsi, işlərin aparılması zamanı təhlükəsizlik qaydalarının təmin edilməsi vəzifəsini daşıyan obyektin sahibi Şükür Əhmədov və onun iş icraçısı qismində cəlb etdiyi "Şən" MMC-nin baş mühəndisi Alıyev Şamil Mahmud oğlu tərəfindən mövcud norma və qaydalar kobud şəkildə pozulub, taxta və metal dirəklərin ölçüləri düzgün seçilmədiyi, beton işləri müvafiq texnologiyaya riayət edilmədiyindən birtərəfli aparılaraq dirəklər və sütunlar yükün ağırlığına davam gətirməyib zəncirvari şəkildə aşaraq qəliblər dağılıb, nəticədə iki nəfərin ölümü və bir neçə şəxsin xəsarət alması ilə nəticələnən ağır hadisə baş verib. Araşdırma zamanı Şükür Əhmədovun, eyni zamanda, "Şən" MMC-nin rəsmi olaraq təsisçisi kimi qeydiyyatda olması, "Neapol" otelinin isə həmin cəmiyyətin nəzdində fəaliyyət göstərməsi müəyyən olunub. Törətdiyi əməllərinə görə Şükür Əhmədov və Şamil Alıyevə Cinayət Məcəlləsinin ehtiyatsızlıqdan zərər çəkmiş şəxsin ölümünə və ya digər ağır nəticələrə səbəb olan tikinti işlərinin aparılmasının təhlükəsizlik qaydalarını pozmağa görə cinayət məsuliyyəti nəzərdə tutan 222.2-ci maddəsi ilə ittiham elan olunaraq, barələrində Abşeron Rayon Məhkəməsi tərəfindən həbs qətimkan tədbiri seçilib. İş üzrə zərərçəkmiş şəxslər, şahidlər dindirilib, məhkəmə-tibbi, məhkəmə-tikinti ekspertizaları təyin edilib.
Hazırda cinayət işi üzrə ibtidai istintaq davam edir. /APA/