Hadisə

Ana səhifə

Hadisə

Azərbaycanın Qazax rayonunun Ermənistanla həmsərhəd kəndindən reportaj

28 dekabr 2007 10:23 (UTC +04:00)

818 evdən ibarət kəndin əhalisi əsasən əkinçilik və maldarlıqla məşğul olurlar. II Şıxlı kəndində əkinə yararlı 3000 hektar sahə olsa da, sakinlər sahələri suvarmaqda problemlərlə üzləşirlər. SSRİ dövründə kəndin əkin sahələrinin suvarılması üçün Gürcüstanın Xram çayından yerli sakinlərin “Dəhnə” adlandırdığı kanal çəkilib. Lakin başlanğıcını Xram çayından götürən bu kanalın suyu 4-5 il əvvəl Gürcüstan ərazisindən kəsilib. Buna görə də sərhəd kəndinin sakinləri uzun müddət sahələri suvarmaqda əziyyət çəkiblər. Lakin bu problem avqust ayında qismən də olsa, öz həllini tapıb. Artıq Dəhnə kanalına az da olsa, su verilir və bu su sahələri suvarmağa kifayət edir. Əkin sahələrinin suvarılması problemi qismən öz həllini tapsa da, Ermənistan və Gürcüstanla sərhəddə yerləşən bu kəndin həllini gözləyən problemləri qalmaqdadır. Bu problemlər kəndin mavi yanacaqla təmin olunmaması və içməli su çatışmazlığıdır. Əvvəllər kəndə
Xram çayından su xətti çəkilsə də, sonradan su vuran nasosların və yeraltı boru xətlərinin sıradan çıxması II Şıxlıda ciddi problemlər yaradıb. Hazırda kənd sakinləri içməli suyu kəndə sifarişlə xüsusi maşınlarda gətirirlər. Kənd 15 ildir ki, mavi yanacağa həsrət qalıb. Sakinlərin sözlərinə görə, SSRİ dövründə kəndin 40 faizi mavi yanacaqla təmin olunub. Kəndə mavi yanacaq verilməsi dayandırılandan sonra yeraltı və yerüstü boru kəmərləri istifadəsiz qalıb və çürüyərək sıradan çıxıb. Əraziyə hətta mavi yanacaq verilməsi mümkün olsa belə, bu kəmərlər sisteminin yenidən qurulması lazımdır. Hələlik isə sakinlər mavi yanacağa və içməli suya olan tələbatlarını öz vəsaitləri hesabına ödəməyə məcburdur. Onların sözlərinə görə, bir ailənin hər ay içməli su və odun almasına təqribən 140-160 manat pul tələb olunur. Bu isə ildə hər ailənin büdcəsinə 1600-1800 manat vəsaitə başa gəlir ki, 818 evdən ibarət II Şıxlı kəndində içməli su və yanacaq problemini həll etmək üçün ildə təqribən 1 milyon manatdan çox vəsait xərcləndiyini söyləmək artıqdır. II Şıxlı kəndinin icra nümayəndəsi İsa Tanrıverdiyev APA-ya açıqlamasında kəndin üzləşdiyi problemlərin həll olmaq üzrə olduğunu deyib: “Kəndin bütün problemləri ardıcıl şəkildə həll olunmaqdadır. Gələn ilin martından kəndə mavi yanacaq xəttinin çəkilməsinə başlanılacaq. Kəndimizin içməli su probleminin həlli istiqamətində də işlər görülür. İkinci Şıxlı kəndinə içməli su xəttinin çəkilməsi artıq layihələşdirilib və gələn ilin ilk rübündən etibarən kəndə yeni su xəttinin çəkilməsinə başlanılacaq”. Qeyd edək ki, gələn il Qazax rayonunun 10 kəndinə qaz kəmərlərinin çəkilməsi və bu kəndlərin mavi yanacaqla təmin edilməsi nəzərdə tutulur. Bu kəndlərdən biri də II Şıxlı kəndidir. /APA/