Hərbi

Ana səhifə

Hərbi

Ermənistanın müdafiə naziri itkin düşmüş sayılan erməni hərbçilərinin taleyindən xəbərdardır

15 iyul 2010 08:36 (UTC +04:00)

APA-nın xəbərinə görə, S. Ohanyan jurnalistlərin suallarına cavabında deyib ki, bu il ərzində itkin düşmüş hərbçilərdən heç biri tapılmayıb: “Biz hər gün heç olmasa bir neçə insanın taleyi haqda xəbər tutmaq üçün iş aparırıq”. Nazir bildirib ki, Beynəlxalq Qırmızı Xaç Komitəsinin ötən ilə olan məlumatına əsasən Qarabağ müharibəsi zamanı itkin düşmüş erməni və azərbaycanlıların sayı 4-5 min nəfərdir. Ermənistandakı “Hüquqi özbaşınalığa qarşı” adlı ictimai təşkilat itkin düşmüş ermənilərin sayının 1000 nəfər olduğunu qeyd edir. Müharibə iştirakçısı olan azərbaycanlı hərbçilər bununla bağlı maraqlı bir faktı xatırladıblar.

1994-cü ilin aprel ayının sonunda Tərtər istiqamətində qanlı döyüşlər gedib və ciddi itkilər verən erməni tərəfi döyüş meydanında çoxlu sayda ölü və yaralı qoyaraq geri çəkilib. Torpaqtəpə yüksəkliyinə növbəti hücumdan sonra Eçmiadzin batalyonunun komandiri, “Kamikadze” ləqəbli kapitan Gevorq Ayrapertyan ağ bayraq qaldıraraq Azərbaycan ordusunun mövqelərinə yaxınlaşıb. O, hərbi hissənin qərargahına aparılıb və dindirilib. Məlum olub ki, G. Ayrapetyanın rəhbərlik etdiyi, Ermənistanda formalaşdırılmış 296 nəfərdən ibarət motoatıcı batalyon aprelin 21-də Tərtər istiqamətinə göndərilib. Bir həftəlik fasiləsiz döyüşlərdə batalyonun 200-ə yaxın əsgəri ölüb və yaralanıb. Torpaqtəpədəki son döyüşdə G. Ayrapetyanın yaxın qohumları, eləcə də 83-cü motoatıcı briqadanın qərargah rəisi, “Oçkarik” ləqəbli mayor Qaçik Oqanesyanın meyiti döyüş meydanında qalıb. Briqadanın komandiri, polkovnik Manvel Qriqoryan G. Ayrapetyana nə yolla olursa olsun xəbər İrəvana çatmadan meyitləri dəyişdirməyi əmr edib. G. Ayrapetyanın sözlərinə görə, geri çəkilən əsgərləri şəxsən güllələyən M. Qriqoryan bu zalımlığı ilə əlaqədar “Myasnik” ləqəbini alıb. (O, daha sonra Ermənistan müdafiə nazirinin müavini olub və “Yerkrapa” Birliyinə rəhbərlik edib. 2007-ci ildə Ter-Petrosyanın tərəfinə keçdikdən sonra M. Qriqoryan ordudan xaric edilib.)

G. Ayrapetyan bildirir ki, M. Qriqoryan və o vaxt Dağlıq Qarabağın “müdafiə naziri”nin müavini, polkovnik Seyran Ohanyan ölən əsgərləri Talış kəndində basdırmağı, sənədlərdə isə onları itkin düşmüş kimi qeyd etməyi tapşırıblar. Məqsəd Ermənistanda panika yaranmasının qarşısını almaq olub. Çünki çoxlu sayda meyit görən ailələr övladlarını Qarabağa göndərməyə bilərdilər. G. Ayrapetyan 1 həftə ərzində 1445 adlı yüksəkliyə gedən yolun sağında 300-ə yaxın erməni əsgərinin basdırıldığını açıqlayıb. O dindirilmə zamanı qorxu içində bəyan edib ki, Ermənistana qayıdarsa, həlak olmuş əsgər və zabitlərin yaxınları onu öldürər. Azərbaycan tərəfi belə bir qərar qəbul edib ki, meyitlərin dəyişdirilməsi yalnız G. Ayrapetyanın ifadələri təsdiqləndikdən sonra həyata keçirilsin. Komandanlıqla razılaşdırıldıqdan sonra G. Ayrapetyan buraxılıb. Onun sonrakı taleyi haqqında heç bir məlumat yox idi. Lakin 2009-cu ildə Ermənistan mətbuatı belə bir xəbər yaydı ki, 2007-ci ildə intizamsızlığa görə Ermənistan Silahlı Qüvvələrinin sıralarından qovulmuş podpolkovnik G. Ayrapetyan həbs edilib.

Bu faktlar Ermənistanın müdafiə naziri S. Ohanyanın itkin düşmüş əsgər və zabitlərlə bağlı açıqlamalarının yalan olduğunu ortaya qoyur. S. Ohanyan və yaxın ətrafı bu hərbçilərin meyitlərini Ermənistandakı ailələrinə göndərmədən onların basdırılmasını əmr ediblər. Beynəlxalq Qırmızı Xaç Komitəsi G. Ayrapetyanın göstərdiyi yerlərdə mütəxəssislərin iştirakı ilə monitorinq aparmalı və əsl həqiqət üzə çıxmalıdır.

Dağlıq_Qarabağ