İncəsənət

Ana səhifə

İncəsənət

Sərxan Kərəmoğlunun çəkəcəyi “Alın yazısı” filmində Lyudmila Qurçenko da rol alacaq

17 dekabr 2008 12:36 (UTC +04:00)

Bakı. Ülkər Qasımova-APA. Azərbaycan, Türkiyə və Rusiya sənətçilərinin birgə iştirakı ilə “Alın yazısı” adı altında bədii film çəkiləcək. APA-nın məlumatına görə, bu gün filmin əsas yaradıcı heyəti mətbuat konfransı keçirib. Filmin ideya müəllifi və quruluşçu rejissor Sərxan Kərəmoğludur. Filmdə Türkiyənin tanınmış aktyorları “Böyük Yalan” serialında Rühsan hanım obrazını yaradan Hülya Darcan, “Yaprak dökümü” serialında Əli Rza bəy obrazını canlandıran Xəlil Ərgün, Türkiyədə yaşayan azərbaycanlı aktrisa Məlahət Abbasova, Azərbaycanın xalq artistləri Yaşar Nuri, Amaliya Pənahova və başqaları çəkiləcəklər. Bugünkü mətbuat konfransında iştirak etmək üçün isə Hülya Darcan, Məlahət Abbasova dünən gecə Bakıya gəliblər. Xəlil Ərgünün isə Bakı səfəri “Yaprak dökümü” serialının çəkilişləri davam etdiyinə görə baş tutmayıb. Tədbirdə çıxış edən filmin rejissoru Sərxan Kərəmoğlu aktyorun bu həftənin cümə günü Bakıya gələcəyini vurğulayıb. O bildirib ki, filmdə baş rolu Moskvada yaşayan həmyerlimiz, modelyer Qərinə Aslanova canlandıracaq: “Filmdə bu xanım mənim bacım rolunda çıxış edəcək. Bu filmin istehsalı üçün bizə ilk öncə DAK-ın Rusiya nümayəndəliyinin rəhbərliyindən, şəxsən Mirəşrəf Fətiyevdən dəstək gəldi və ondan sonra bu filmi çəkməyə qərar verdik. Filmdə eyni zamanda SSRİ-nin xalq artisti Lyudmila Qurçenko da oynayacaq. Filmin çəkilişləri Bakı, İstanbul və Moskvada aparılacaq”.

S. Kərəmoğlu deyib ki, film Türkiyənin tanınmış şirkətlərindən birində istehsal olunacaq, dublyajı isə Rusiyada aparılacaq. Tədbirdə çıxış edən Hülya Darcan isə bu təklifi qəbul etməsindən heç də peşmanlıq duymadığını bildirib: “Türkiyədən bir çox təkliflər var, ancaq mən hər təklifləri qəbul etmirəm. Əgər mən bu təkliflərin hamısına razılıq versəm, gün ərzində yarım saat belə boş vaxtım olmaz. Sərxan elə müraciət etdi ki, mən vaz keçə bilmədim və təklifi dəyərləndirdim”. H. Darcan filmdə iddialı və yalqız bir qadın obrazı yaradacaq. Bu rolun ona çox yaxın olduğunu qeyd edən türkiyəli aktrisa filmin çəkilişindən böyük zövq alacağına əmin olduğunu bildirib. S. Kərəmoğlu deyib ki, bu, bahalı bir film olacaq: “Azərbaycanda çəkiləcək filmlərdən qat-qat bahalı bir film olacaq. Üç dildə səsləndiriləcək film Azərbaycan, Rusiya və Türkiyədə nümayiş olunacaq. Bu nümayişlər həm kinoteatrlarda, həm də televiziyalarda təşkil olunacaq. Bu, maarifləndirici bir filmdir. Burada sevgi hekayəti də olacaq, ancaq sosial problemlər, narkomaniyaya, yoxsulluğa qarşı mübarizə də öz əksini tapacaq. Fİlmdə kimsəsiz bir uşağın həyatı canlandırılacaq”.