İncəsənət

Ana səhifə

İncəsənət

Azərbaycanın məşhur caz ifaçısı Əzizə Mustafazadə Heydər Əliyev Sarayında konsert verib

20 dekabr 2008 08:27 (UTC +04:00)

Bakı. Ülkər Qasımova - APA. Amerikada yaşayan Azərbaycanın caz ifaçısı, dünya şöhrətli cazmen Vaqif Mustafazadənin qızı Əzizə Mustafazadə Heydər Əliyev Sarayında konsert verib. APA-nın məlumatına görə, caz ustası iki saata yaxın öz bəstələri yanaşı, Vaqif Mustafazadənin və dünya klassik bəstəkarların əsərlərini ifa edib. Sadə bəzədilmiş, yalnız qara royalın qoyulduğu səhnəyə çıxan Əzizə Mustafazadə öncə tamaşaçıları salamlayıb: “Mən yenidən Bakıda konsert verməkdən çox məmnunam. Bu gün Sizin üçün xüsusi proqram hazırlamışıq. Rus dilində danışsam da, bütün ifa etdiyim mahnılar Azərbaycancadır. Çünki mənim qəlbim Azərbaycandadır”. Atası haqqında da danışan Ə. Mustafazadə onun musiqiləri ilə böyüdüyünü vurğulayıb: “Vaqif Mustafazadədən bir də olmayacaq, o, yenidən doğulmayacaq. Mən onun musiqiləri ilə böyüdüm və bu gün də o musiqisiz yaşaya bilmirəm”.

Sonra konsert başlayıb. Ə. Mustafazadə ilk olaraq Heydər Əliyevə ithaf etdiyi “Hər zaman” kompozisiyasını ifa edib. Daha sonra pianoçu “Ürək döyüntüləri”, “Romantik axşam”, “Şaman”, “Oxuyan təbiət”, “Mən sevsəm əbədi sevəcəyəm” caz musiqilərini səsləndirib. O, Xocalı faciəsinə həsr etdiyi “Ağlayan torpaq” musiqisini də ifa edib. Ə. Mustafazadə Xocalı faciəsi haqqında fikirlərini də bölüşüb: “Həmin faciədə dünyasını dəyişən günahsız insanları heç zaman unutmayacağıq. Bütün bu faciələri unutmaq mümkün deyil. Bizim Qarabağ kimi gözəl torpağımız var”.

Qeyd edək ki, Ə. Mustafazadə hər ifasından sonra tamaşaçılarla ünsiyyətə girib, onlarla fikirlərini bölüşüb.

Konsert bitdikdən sonra tamaşaçıların kəsilməyən alqışları altında ikinci dəfə səhnəyə qayıdan Ə. Mustafazadə müəllifi olduğu məşhur “Mart” kompozisiyanı səsləndirib. O, ənənəvi olaraq pianoda kompozisiyaları yüksək səviyyədə ifa etməklə yanaşı, çaldığı mahnıları canlı oxuyub. Konsertdə caz ifaçısını onun Amerikadan özü ilə gətirdiyi musiqiçilər Ralf Çetto və Simon Çimbardo müşayiət edib.

Tamaşaçılar Ə. Mustafazadəni ayaq üstə alqışlarla yola salıblar. “İkinci Vaqif Mustafazadə” deyərək ona müraciət edən tamaşaçılara Ə. Mustafazadə yenidən “Vaqif Mustafazadədən bir də olmayacaq” cavabını verib.

Sonda tamaşaçılara təşəkkür edən caz ifaçısı yenidən Bakıda konsert verəcəyinə söz verib.

Qeyd edək ki, konsert “Art Community”nin təşkilatçılığı ilə keçirilib.

Əzizə Mustafazadə