İncəsənət

Ana səhifə

İncəsənət

İlham Namiq Kamalın 60 illik yubileyi dövlət səviyyəsində qeyd olunacaq

06 yanvar 2009 10:37 (UTC +04:00)

Bakı. Ülkər Qasımova-APA. Yanvarın 9-da xalq artisti İlham Namiq Kamalın 60 yaşı tamam olacaq. Azərbaycan Dövlət Musiqili Komediya Teatrının mətbuat xidmətindən APA-ya bildirilib ki, yubiley mərasiminin növbəti aylardan birində dövlət səviyyəsində keçirilməsi nəzərdə tutulur. Aktyorun 60 illik yubileyinin Musiqili Komediya Teatrında keçirilməsi planlaşdırılır.

Qeyd edək ki, İlham Namiq Kamal Azərbaycan Dövlət İncəsənət İnstitutunun “Dram-kino aktyorluğu” fakültəsində, SSRİ xalq artisti Ədil İsgəndərovun və xalq artisti Rza Təhmasibin kursunda təhsil alıb. Tələbə vaxtı Molyerin “Jorj Danden” komediyasında baş qəhrəman rolunu uğurla ifa etdiyindən onu institutun Tədris Teatrının aktyor truppasına qəbul ediblər. 1972-ci ildə Akademik Milli Dram Teatrına dəvət alan aktyor bu səhnədə Misyö Jordan və Dərviş Məstəli şah (“Misyö Jordan və Dərviş Məstəli şah”), Sarı Qarayev (“Varlı qadın”), Zaman müəllim (“Bu dünyanın adamları”), Gülən adam (“Hərənin öz payı”), Kişi (“Mənim ərim dəlidir”), doktor Qaratay (“Afət”) kimi rollarda çıxış edib. 1989-cu ildən Dövlət Gənclər Teatrında çalışan İlham Əhmədov burada Məsuliyyətsiz (“Çarəsiz sərnişinlər”), Dadaşbala (“Dadaşbala əməliyyatı”), Sultanqulu (“Sultanqulu körpüsü”), Kələntər (“Dağ tikirik”), Daniel (“Arvadımın qatili”), Kazbek (“Arvadımın əri özüməm”) kimi baş rolların ifaçısı olub. Azərbaycan Dövlət Gənclər Teatrında işləməklə yanaşı, Musiqili Komediya Teatrında da aktyor kimi çalışan aktyor bu teatrda bir sıra yaddaqalan obrazlar yaradıb. 1997-ci ildən pedaqoji fəaliyyətlə məşğul olan xalq artisti Azərbaycan Dövlət Mədəniyyət və İncəsənət Universitetində kafedra müdiri, professordur.