İncəsənət

Ana səhifə

İncəsənət

Bakı şəhər Mədəniyyət və Turizm İdarəsi Yalçın Rzazadənin həyat yoldaşının işdən çıxarılması faktı ilə bağlı bəyanat yayıb

13 yanvar 2009 12:20 (UTC +04:00)

Yalçın Rzazadənin yoldaşı Roza Rzazadə Ənvər Məmmədxanlı adına kitabxananın direktoru vəzifəsində uzun müddət çalışmasına baxmayaraq, rəhbərlik etdiyi kitabxananı iflic vəziyyətinə salıb, vəzifəsinin icrasına məsuliyyətsiz yanaşıb, rəhbərlik etdiyi sahədə əmək və icra intizamına ciddi əməl etməyib, kadrların seçilib yerləşdirilməsi məsələsinə biganə münasibət bəsləyib, kitabxanada aidiyyəti olmayan təşkilatların qanunsuz istifadəsi üçün şərait yaradıb və digər ciddi nöqsanlara yol verib”. Bu bəyanatla Bakı şəhər Mədəniyyət və Turizm İdarəsinin mətbuat xidməti xalq artisti Yalçın Rzazadənin həyat yoldaşının qanunsuz işdən çıxarılması və təzyiqlərə məruz qalması ilə bağlı verdiyi açıqlamalarına münasibət bildirərkən çıxış edib. Mətbuat xidmətindən APA-ya daxil olan bəyanatda bildirilir ki, sözügedən kitabxananın fəaliyyətində olan nöqsanlarla bağlı vətəndaşlar Mədəniyyət və Turizm Nazirliyinə və digər dövlət orqanlarına dəfələrlə şikayətlər edib və həmin şikayətlərə əsasən, Mədəniyyət və Turizm Nazirliyi Ə. Məmmədxanlı adına kitabxananın fəaliyyətinin yoxlanılması barədə Bakı şəhər Mədəniyyət və Turizm İdarəsinə tapşırıq verib: “Kitabxananın fəaliyyəti bir neçə dəfə yoxlanılaraq ciddi nöqsanlar aşkarlanıb. Direktor Roza Rzazadəyə nöqsanlara görə 8 avqust 2008-ci il tarixli əmrlə töhmət elan edilərək, mövcud nöqsanların aradan qaldırılması barədə tapşırıq verilib. Lakin Roza Rzazadə tapşırıqlara əməl etmədiyi və tanınmış müğənni Yalçın Rzazadənin həyat yoldaşı olduğunu əsas gətirərək, heç kəsi tanımadığını və istədiyini edəcəyini bildirərək işində dönüş yaratmayıb”.

Bəyanatda, həmçinin, kitabxananın fəaliyyəti ilə əlaqədar vətəndaşların şikayətlərinin davam etdiyi bildirilir: “Şikayətçilərin müraciətlərini nəzərə alaraq, kitabxanaya yenidən komissiya göndərilib və kitabxananın fəaliyyətində ciddi nöqsanlar aşkar edilib. Belə ki, Roza Rzazadənin qanunvericiliyi pozaraq övladını və digər ailə üzvünü həmin kitabxanada işə götdüyü məlum olub. Adıçəkilən şəxslər başqa yerdə işləmələrinə baxmayaraq, Ə. Məmmədxanlı adına kitabxanada da şöbə müdiri və kitabxanaçı vəzifələri icra edərək əmək haqqı alıblar. Həmçinin kitabxananın ştat cədvəlində 9 nəfərdən beşinin “ölü can” olduğu aşkarlanıb. Faktiki çalışan üç kitabxanaçı isə ifadələrində Roza Rzazadənin işə istədiyi vaxt gəldiyini bildiriblər. Bundan başqa, yoxlama nəticəsində kitabxananın nadir fondundakı kitabların bərbad vəziyyətə düşdüyü, oxucularla işin düzgün qurulmadığı, kitabxananın rus bölməsində 100 şəxsiyyət vəsiqəsi, Azərbaycan bölməsində isə şəxsiyyəti təsdiq edən 50 sənəd, o cümlədən 18 xarici pasport aşkar edilib, kitabxanada dövlət vəsaiti hesabına alınan bəzi avadanlıqlar yerində olmayıb. Göstərilən nöqsanlar barədə direktor Roza Rzazadə izahat verməkdən imtina edərək komissiya üzvlərini hədələyib, onlara xalq artisti Yalçın Rzazadənin həyat yoldaşı olduğunu bildirib, ona heç kimin heç nə edə bilməyəcəyini söyləyib.

Direktor Roza Rzazadənin qeyd olunan nöqsanlara görə əvvəllər töhmət almasına baxmayaraq, işində dönüş yaratmaması və sonuncu yoxlamanın nəticəsi nəzərə alınaraq onun işdən çıxarılması ilə bağlı müvafiq qaydalara uyğun olaraq Həmkarlar Komitəsinə müraciət edilib, Komitənin razılığı əsasında direktor Roza Rzazadə əmək qanunvericiliyinə uyğun şəkildə vəzifəsindən azad edilib. Lakin Roza Rzazadə kitabxananı heç kimə təhvil verməyəcəyini bildirərək İdarə tərəfindən göndərilmiş müvafiq komissiyanı hədələyib. Məsələnin ciddiliyini nəzərə alaraq, Bakı şəhər Mədəniyyət və Turizm İdarəsinin rəisi kitabxanaya gedərək orada Roza Rzazadənin və oğlunun hədə-təhqirlərinə məruz qalıb. Roza Rzazadəyə vəzifəsindən azad olunması və kitabxananı müvafiq qaydada təhvil verilməsi ilə bağlı izahatlar təqdim olunmasına baxmayaraq, o, komissiya üzvlərinə və idarə rəisinə təzyiqlərini davam etdirib. Roza Rzazadənin hədə və təhqirləri nəzərə alınaraq, kitabxanaya polis dəvət olunub və müvafiq qaydada akt tərtib edilib. Roza Rzazadənin həyat yoldaşı Yalçın Rzazadə Bakı şəhər Mədəniyyət və Turizm İdarəsinə zəng edərək idarə rəisinə təzyiq edib, ona “Mənim xalq artisti olduğumu, Prezident təqaüdçüsü olduğumu bilmirsənmi? Sən kimsən ki, mənim həyat yoldaşımı işdən çıxardırsan, mən bu məsələni belə qoymayacağam!” deyərək hədə-qorxu gəlib”.

Bəyanatın sonunda Roza Rzazadənin kitabxanada uzun müddət işlədiyini və müvafiq orqanlarla razılıq əldə etdiyini əsas gətirərək, kitabxananı özəlləşdirilmək istəyi ilə bağlı dəfələrlə Bakı şəhər Mədəniyyət və Turizm İdarəsinə təklif irəli sürməsi də qeyd olunub. Lakin onun təklifləri qəbul edilməyib: “Roza Rzazadənin kitabxananın fəaliyyətini iflic vəziyyətinə salmasının səbəbinin kitabxananı özəlləşdirmək istəyi olduğunu nəzərə alsaq, onun və həyat yoldaşı Yalçın Rzazadənin uzun müddət planlaşdırdıqları məqsədlərinə çatmadıqları üçün Mədəniyyət və Turizm Nazirliyinə və Bakı şəhər Mədəniyyət və Turizm İdarəsinə qarşı yalan ittihamlar irəli sürməyə, böhtanlar atmağa başlamaları heç də təsadüfi deyl”.