İncəsənət

İncəsənət

“Bakı İslam Mədəniyyətinin Paytaxtı” tədbirinin açılışı fevralın 18-də keçiriləcək

31 yanvar 2009 11:06 (UTC +04:00)

Bakı. Ülkər Qasımova - APA. 2009-cu il Bakının “İslam Mədəniyyətinin Paytaxtı” elan olunması ilə bağlı xüsusi tədbirlər planı hazırlanıb. Mədəniyyət və Turizm Nazirliyindən APA-ya verilən məlumatda bildirilib ki, “İslam Mədəniyyətinin Paytaxtı”nın açılışı fevralın 18-də keçiriləcək. Həmin gün səhər müxtəlif ölkələrdən gələcək qonaqlar Fəxri Xiyabanı və Şəhidlər Xiyabanını ziyarət edəcəklər. Daha sonra isə nümayəndə heyətinin Azərbaycanın mədəniyyət və turizm naziri Əbülfəs Qarayevlə görüşü və mətbuat konfransının keçirilməsi nəzərdə tutulur.

Fevralın 18-də həmçinin Muzey Mərkəzində “Qədim Bakı” kitabının təqdimatı və nümayəndə heyətinin Azərbaycan Tarix Muzeyinə, Qız Qalasına, Şirvanşahlar Sarayına, İçərişəhərə ekskursiyaları təşkil olunacaq. Bundan başqa, “Bakı İslam Mədəniyyətinin Paytaxtı”nın rəsmi internet saytı (www.baku-icc-2009.az) təqdimatı, axşam isə Heydər Əliyev Sarayında tədbirin təntənəli açılış mərasimi keçiriləcək. Məlumata görə, açılış mərasimində təşkil olunacaq konsertdə bütün Azərbaycan musiqisi kompleks şəklində təqdim olunacaq. Qeyd edək ki, açılışda iştirak etmək üçün Bakıya səfər edəcək rəsmi nümayəndə heyətinin tərkibinə İSESKO-nun baş katibi Əbdüləziz Osman Əl-Türeycri, İslam Konfransı Təşkilatının (İKT) baş katibi Ekmaləddin İhsanoğlu, İRSİKA-nın baş direktoru Halid Eren daxildirlər. Tədbirdə həmçinin Türkiyə, İran, Türkmənistan, Qırğızıstan və digər ölkələrin mədəniyyət nazirləri, İzmir, Hyuston, Varşava və digər şəhərlərin merlərinin iştirakı planlaşdırılır.

Açılış tədbirləri fevralın 19-da da davam edəcək. Belə ki, həmin gün qonaqların Azərbaycan Dövlət Akademik Opera və Balet Teatrında Fikrət Əmirovun “Min bir gecə” baletinin nümayişində iştirakı planlaşdırılır.

Qeyd edək ki, “Bakı İslam Mədəniyyətinin Paytaxtı” ilə bağlı tədbirlər ilboyu davam etdiriləcək.