İncəsənət

İncəsənət

Bu gün Həsən Turabovun vəfatının 6-cı ildönümüdür

23 fevral 2009 10:56 (UTC +04:00)

Bakı. Ülkər Qsımova-APA. Bu gün Azərbaycanın xalq artisti, unudulmaz obrazlarla yaddaşlara həkk olunan Həsən Turabovun vəfatından 6 il keçir. Həsən Turabovun vəfatının 6-cı ildönümü ilə əlaqədar uzun illər çalışdığı Azərbaycan Dövlət Akademik Milli Dram Teatrının kollektivi aktyorun məzarını ziyarət ediblər. Teatrdan APA-ya bildirilib ki, hər il unudulmaz aktyorun həm vəfat, həm də doğum günündə məzarı ziyarət olunur və onun xatirəsi anılır. Hazırda Azərbaycan Dövlət Milli Dram Teatrının binası əsaslı təmirdə olduğu üçün bu il Həsən Turabovun xatirəsinə həsr olunmuş tədbirin keçirilməsi mümkün olmayıb.
Qeyd edək ki, Azərbaycanın xalq artisti Həsən Turabov 1938-ci il, aprelin 24-də Bakıda anadan olub. Azərbaycan Dövlət Mədəniyyət və İncəsənət Universitetinin aktyorluq fakültəsində təhsil alıb. 1960-cı ildən Azərbaycan Dövlət Milli Dram Teatrında aktyor kimi fəaliyyətə başlayıb və ömrünün sonuna qədər bu teatrda çalışıb. Bir müddət teatrın direktoru və bədii rəhbəri vəzifəsində çalışıb. Səhnə fəaliyyətinə başladığı ilk illərdən lirik-psixoloji üslubu ilə seçilən Həsən Turabov qısa müddətdə Azərbaycan və dünya dramaturqlarının əsərlərində baş rolların ifaçısı kimi teatrın aparıcı sənətkarlarından birinə çevrilib. Azərbaycan Dövlət Mədəniyyət və İncəsənət Universitetinin professoru kimi pedaqoji fəaliyyəti də səmərəli olub. Dövlət mükafatı laureatı (1972), xalq artisti (1982) Həsən Turabov 2003-cü ilin fevralın 23-də dünyasını dəyişib. H.Turabov bir sıra bədii filmlərdə, o cümlədən, televiziya filmlərində yaratdığı maraqlı və yaddaqalan surətlər onun aktyor həyatının böyük bir hissəsini təşkil edib və yüksək sənətkarlıq bacarığını bariz şəkildə nümayiş etdirib. Aktyor “Yeddi oğul istərəm”, “Babək”, “Dantenin yubileyi”, “Bəyin oğurlanması”, “Qaçaq Nəbi”, “Axırıncı aşırım”, “Ürək... Ürək...”, “Sevinc buxtası”, “Çarvadarların izi ilə”, “Qəm pəncərəsi” və başqa filmlərdə yaratdığı obrazlarla hər bir tamaşaçının ürəyində özünəməxsus yer tutub.