İncəsənət

Ana səhifə

İncəsənət

Elza Seyidcahanın “Azərbaycan” adlı yeni klipinin təqdimatı keçirilib

24 fevral 2009 13:01 (UTC +04:00)

Bakı. Ülkər Qasımova-APA. Bu gün Muğam Teatrında müğənni–bəstəkar Elza Seyidcahanın “Azərbaycan” adlı yeni klipinin təqdimat mərasimi keçirilib.
APA-nın məlumatına görə, sözləri millət vəkili Qənirə Paşayevaya məxsus olan mahnının bəstəkarı ifaçının özüdür. Qara Qarayev adına Dövlət Kamera Orkestrinin müşayiəti ilə ifa olunan mahnının ekran variantında da sözügedən orkestr çəkilib.
Sənətçinin yeni klipinin rejissoru Pünhan Həsənidir. Tədbirdə çıxış edən Azərbaycan Bəstəkarlar İttifaqının sədri, xalq artisti Firəngiz Əlizadə təqdim olunan yeni klipi sənət əsəri adlandırıb: “Sözsüz ki, bu janrda mahnıların ifa olunması və belə kliplərin çəkilməsi çox müsbət haldır. 17 il bundan öncə Azərbaycan xalqının başına gətirilən Xocalı soyqırımı ərəfəsində bu klipin təqdimatının keçirilməsini yüksək qiymətləndirirəm. Çünki, Elza Seyidcahanın ifa etdiyi “Azərbaycan” odası qəhrəmanlıq ruhundadır”.
Xalq artistləri Afaq Bəşirqızı, Ramiz Zöhrabov, Faiq Ağayev, rejissor Şeyx Əbdül Mahmudbəyli və başqaları Elza Seyidcahanı təbrik ediblər. Tədbirdə tanınmış İran müğənnisi Ququşun şəxsi fotoqrafı Həmid Zakəri Elza Seyidcahana öz əsərini hədiyyə edib. Elza Seyidcahan isə ona hədiyyə edilən bu sənət əsərindən klipdə də istifadə olunduğunu deyib. Təqdimat mərasimində iranlı foto-rəssam özü də iştirak edib.