İncəsənət

İncəsənət

“Hökmdarın taleyi” filminin Heydər Əliyev Sarayında geniş premyerası keçiriləcək

06 may 2009 11:54 (UTC +04:00)

Bakı. Ülkər Qasımova-APA. Mayın 22-si və 23-də Heydər Əliyev Sarayında İlyas Əfəndiyevin “Hökmdar və qızı” faciəsi əsasında Elçin Əfəndiyevin ssenarisi ilə çəkilən “Hökmdarın taleyi” filminin geniş şəkildə ilk premyerası keçiriləcək. Bu barədə APA-ya açıqlamasında filmin hazırlandığı “A.S.V.A Profi Studia XXI” Prodüser Mərkəzinin və filmin baş prodüseri Vaqif Əsədullayev məlumat verib. Onun sözlərinə görə, film Heydər Əliyevin 2000-ci ildə imzaladığı “İlyas Əfəndiyevin xatirəsinin əbədiləşdirilməsi haqqında” sərəncam əsasında hazırlanıb. V. Əsədullayev bildirib ki, Heydər Əliyev Sarayında aparılan əsaslı təmir işlərindən sonra ilk nümayiş olunacaq film “Hökmdarın taleyi” olacaq. Filmin baş prodüseri onu da qeyd edib ki, əvvəlcə filmin geniş şəkildə təqdimatının bir gün keçirilməsi planlaşdırılsa da, təqdimatı iki gün keçirməyi qərarlaşdırıblar: “Bu film Azərbaycanın tarixindən bəhs edir və bu filmə hər bir Azərbaycan vətəndaşının baxmasını istəyirik. Elə məhz bu səbəbdən də filmin təqdimatını iki gün keçirməyi qərarlaşdırdıq. Artıq filmin afişaları vurulub, televiziya reklamlarına başlanılıb. Mayın 10-dan isə film şəhərin müxtəlif yerlərində yerləşdirilən ekranlarda göstəriləcək. Filmin nümayişinin biletlərini də çox ucuz qiymətə satışa qoymuşuq. Məqsədimiz bu filmə baxmaq istəyən hər bir tamaşaçının filmə baxmasını təmin etməkdir. Ümidvaram ki, iki günlük təqdimatda gözlədiyimiz nəticəni ala biləcəyik”.

Qeyd edək edək ki, “Hökmdarın taleyi” filminin Heydər Əliyev Sarayında iki günlük nümayişinin biletlərinin qiyməti 7-10 manat arasındadır. “Hökmdarın taleyi” filminin çəkilişləri iki il davam edib. Ramiz Fətəliyev və Dilşad Fatxulinin quruluş verdiyi filmin quruluşçu operatoru Dilşad Fatxulin, bəstəkarı isə Polad Bülbüloğludur. Filmdə xalq artisti Fəxrəddin Manafov həm aktyorlarla master-klasslar keçirib, həm də filmdə baş rolu - İbrahimxəlil xan obrazını canlandırıb. Filmdə Məmməd Səfa, Kamran Yunus, Vidadi Həsənov, Günəş Əliyeva, Aysu Əfəndiyeva, Yuri Bariyev, Mehriban Zəki, Sənubər İsgəndərli, Manaf Dadaşov, Muxtar İbadov, Leyli Hüseynli, Əli Cəfərov, Rusiya aktyorları Daniil Spivakovskiy, Aleksandr Qalibin, İlyar Şakunov, Tacikistan aktyoru Saydo Qurbanov və başqaları çəkilib. Film “Mostfilm”in nəzdində fəaliyyət göstərən “Ton studio”da Azərbaycanda bu günə kimi istifadə edilməyən “Dolbi 1/5” sistemində səsləndirilib. Filmin kiçik miqyasda premyerası ötən ilin mayında “Azərbaycan” kinoteatrında keçirilib.