İncəsənət

İncəsənət

Xalq artisti Sərvər Qəniyevlə vida mərasimi keçirilib - FOTOSESSİYA

Xalq artisti Sərvər Qəniyevlə vida mərasimi keçirilib - <font color=red>FOTOSESSİYA</font>

07 sentyabr 2010 12:05 (UTC +04:00)

Bakı. Ülkər Qasımova-APA. Bu gün Üzeyir Hacıbəyli adına Bakı Musiqi Akademiyasında Türkiyənin Bilkənd Universitetinin professoru, xalq artisti Sərvər Qəniyevlə vida mərasimi keçirilib. APA-nın məlumatına görə, vida mərasimində Bilkənd Universitetinin rektoru Əli Doğramaçı, eləcə də TÜRKSOY təşkilatının baş direktoru Düseyn Kaseinov da iştirak edib. Sərvər Qəniyevi son mənzilə yola salmaq üçün təşkil olunan mərasimə çoxsaylı sənətçilər və musiqisevərlər qatılıblar.

Vida mərasimində çıxış edən mədəniyyət və turizm naziri Əbülfəs Qarayev Sərvər Qəniyevin həyat və yaradıcılığından söz açıb, onun Azərbaycan mədəniyyətindəki xidmətlərindən danışıb. Nazir bildirib ki, mərhum görkəmli sənətkar, gözəl insan və müəllim olub.

Vida mərasimində iştirak etmək üçün Bakıya gələn Bilkənd Universitetinin rektoru Əli Doğramaçı Sərvər Qəniyevin daima qəlblərdə yaşayacağını qeyd edib: “Azərbaycan və Türkiyə həm yaxşı, həm pis günlərdə hər zaman birgə olub. Bu gün biz yenə də birlikdəyik. Sərvər Qəniyev yaradıcılığı ilə çox ölkələri birləşdirib. O Misirdə çalışıb, bizim universitetdə isə onun danılmaz xidmətləri olub. Uzun illər Sərvər Qəniyev Bilkənd Universitetində professor, müəllim kimi çalışıb və bir çox istedadlar yetişdirib. Sərvər Qəniyev yaşadığı ömürlə çox böyük, unudulmaz iz buraxıb”.

Üzeyir Hacıbəyli adına Bakı Musiqi Akademiyasının rektoru, xalq artisti Fərhad Bədəlbəyli dostunu son mənzilə yola saldığını deyib: “Bu həyatdan hər birimiz köçüb gedəcəyik. Ancaq elə yaşamaq lazımdır ki, vəfat edəndən sonra desinlər ki, çox yaxşı insan olub və kişi kimi yaşayıb. Bu sözləri Sərvər Qəniyev üçün demək olar”. BMA rektoru mərhumun ailəsində onun yolunu davam etdirən oğlu Toğrul Qəniyevin çox istedadlı insan olduğunu deyib.

TÜRKSOY təşkilatının baş direktoru Düseyn Kaseinov Sərvər Qəniyevin tək Azərbaycanın yox, bütün türk dünyasının sənətkarı olduğunu diqqətə çatdırıb və bu itkini Türk dünyasının itkisi adlandırıb. Onunla dost olduğunu deyən təşkilat rəhbəri, Sərvər Qəniyevi hər zaman özünə böyük qardaş hesab etdiyini vurğulayıb.

Professor Zöhrab Adıgözəlzadə də çıxışında bütün Azərbaycan xalqına baş sağlığı verib və sənətkarın hər zaman yaşayacağını deyib.

Vida mərasimində mərhumun ailəsi adından çıxış edən sənətkarın oğlu, əməkdar artist Toğrul Qəniyev mərasimə gələnlərə təşəkkürünü bildirib və ata itkisinin çox ağır hiss olduğunu əlavə edib. T. Qəniyev atasının azərbaycanlı olduğunu və onun ruhunun da Azərbaycana aid olduğunu deyib: “Atam bu torpaqda dəfn olunmalı idi. Onun özü də, ruhu da Azərbaycana aiddir”.

Mərasimdən sonra mərhum II Fəxri Xiyabanda torpağa tapşırılıb.

Qeyd edək ki, Sərvər Soltan oğlu Qəniyev 1937-ci ildə Bakıda anadan olub. Yaradıcılığı dövründə Üzeyir Hacıbəyov adına Azərbaycan Dövlət Konservatoriyasında müəllim və Müslüm Maqomayev adına Azərbaycan Dövlət Filarmoniyasında solist kimi çalışıb. O, SSRİ-nin bir çox şəhərlərində geniş konsert proqramları ilə çıxış edib. Azərbaycan bəstəkarlarının bir sıra yeni əsərlərinin ilk ifaçısı olub. 1993-cü ildən isə Türkiyədə işləyib. Ankara şəhərindəki Bilkənd Universitetində skripka üzrə müəllim, Akademik Kamera Orkestrinin dirijoru və Beynəlxalq Akademik Böyük Simfonik Orkestrin solisti olub.