İncəsənət

Ana səhifə

İncəsənət

“Carçı film” İstehsalat Birliyində hazırda bir çoxseriyalı filmin ssenarisi üzərində iş gedir - FOTO

“Carçı film” İstehsalat Birliyində hazırda bir çoxseriyalı filmin ssenarisi üzərində iş gedir - <font color=red>FOTO</font>

16 sentyabr 2010 07:53 (UTC +04:00)

Bakı. Ülkər Qasımova-APA. İctimai Televiziya və Radio Verilişləri Şirkətinin (İTV) nəzdində fəaliyyət göstərən “Carçı film” İstehsalat Birliyində hazırda bir çoxseriyalı filmin ssenarisi üzərində iş gedir. Bu barədə APA-ya məlumat verən İTV-nin ictimaiyyətlə əlaqələr şöbəsinin müdiri Tahir Məmmədov bildirib ki, 2005-ci ildən fəaliyyət göstərən “Carçı film”də bu günədək 100 film istehsal olunub: “İctimai Teleradionun ilk beş seriyalı filmi xalq nağılı “Daşdəmirin nağılı”nın motivləri əsasında çəkilmiş “Köhnə dəyirman” filmidir. Yeri gəlmişkən, “Carcı film”in bu istiqamətdə fəaliyyəti davam edir və hazırda başqa nağılların ssenarisi üzərində iş aparılır.
İstehsal olunan filmlər sırasında həm bədii, həm də sənədli filmlər var. Bu filmlər Azərbaycan auditoriyası ilə yanaşı digər ölkələrin tamaşaçılarına da təqdim olunur”.

T. Məmmədovun sözlərinə görə, mərhum prezident Heydər Əliyevin 85 illik yubileyinə həsr olunmuş film doğma dillərinə dublyaj olunduqdan sonra Macarıstanın DUNA, Gürcüstanın İctimai Televiziyası və Türkiyənin TRT kanalı vasitəsilə yayımlanıb. Filmlərin ssenarisi əsasən İctimai Teleradionun yaradıcı heyəti tərəfindən hazırlanır: “Bu sırada tanınmış yazıçılar Rafiq Səməndər, Imir Məmmədli, rejissor Cavid Təvəkküloğlunu qeyd etmək olar. Bununla yanaşı biz uğurlu ssenari ilə müraciət edən digər müəlliflərin də işini dəyərləndirir və onlarla əməkdaşlıq edirik. Buna ən uğurlu misal kimi ötən gün təqdimat mərasimi keçirilən və xalq rəssamı Səttar Bəhlulzadəyə həsr olunan “Sonuncu dərviş” bədii filmini göstərmək olar. Bu filmin ssenarisi təxminən 10 il idi ki, kağız üzərində qalmışdı. Bu cür əsərləri ekranlaşdırmaqla İctimai Teleradio kino sənətinə və Azərbaycan mədəniyyətinin təbliğinə töhfə vermiş olur. İşin digər maraqlı tərəfi odur ki, bu filmlər çox qənaətcil büdcə hesabına başa gəlir. Mövzu seçiminə gəldikdə isə deyə bilərəm ki, əsasən cəmiyyətimizin bugünkü sifarişləri və maarifçilik xətti əsas götürülür”. Şöbə müdiri bildirib ki, İctimai Televiziya 5 il əvvəl yalnız xarici istehsal olan filmləri dublyaj edirdisə, bu gün artıq özü film istehsal edən bir quruma çevrilib.