İncəsənət

Ana səhifə

İncəsənət

Xalq artisti Elxan Əhədzadə ilə yaşadığı evdə vida mərasimi keçirilib – FOTOSESSİYA

Xalq artisti Elxan Əhədzadə ilə yaşadığı evdə vida mərasimi keçirilib – <font color=red>FOTOSESSİYA </font>

08 oktyabr 2010 13:18 (UTC +04:00)

APA-nın məlumatına görə, mərhumla vida mərasimi mərhumun evində baş tutub. Mədəniyyət və Turizm Nazirliyinin əməkdaşları, Musiqili Komediya, Akademik Milli Dram Teatrı, Opera və Balet Teatrının aktyorları, eləcə də Elxan Əhədzadənin sənət dostları vida mərasiminə qatılıblar.

Həyat yoldaşı Səbinə Tofiqqızı həyat yoldaşı ilə xüsusi vida mərasiminin təşkil olunmamasından narazılıq edib. Mərhumun qardaşları və böyük oğlu danışmaq istəməyiblər. Ailə adınan Elxan Əhədzadənin qaynanası Şahnaz Məmmədova jurnalistlərə açıqlama verib və mərhuma diqqət göstərilməməsindən gileylənib: “Uzun illər səhnədə can qoyub, zəhmət çəkib, hətta gözləri görməyən vaxt səhnədə çıxış edib. Belə aktyora teatrda vida mərasiminin keçirilməsinə icazə verilmədi. Heç olmasa II Fəxri Xiyabanda yer verilərdi. Məcbur olub, valideynlərin yanında yer ayırdıq. Bu aktyorun heçmi hörməti yoxdur? Biz onlardan pul və ya nə isə başqa şey istəmədik. Adi hörmət istəyirdik, onu da çox gördülər”.

Ş. Məmmədova deyib ki, xəstə yatdığı vaxt da E. Əhədzadə ilə heç kim maraqlanmayıb: “Vaxtında kömək edilsəydi, müəyyən qədər sağala bilərdi. Bir ay xəstə yatdığı vaxt teatrdan heç kim onunla maraqlanmadı, bircə Yaşar Nuri zəng edirdi. Mən xalq artistinə qarşı bu cür biganəlik görməmişdim. O buna layiq deyildi”.

Musiqili Komediya Teatrının truppa müdiri Novruz Qartal isə deyib ki, Elxanla bir neçə gün əvvəl telefonla əlaqə saxlayıb: “Mənə zəng vurub bildirdilər ki, Elxan “İddiaçı qaraçı” tamaşasında oynamayacaq, çünki vəziyyəti yaxşı deyil. Mən də ona zəng vurub əhvalını soruşdum. Dedi ki, vəziyyəti pisləşib, amma indi yaxşıdır. Əvvəl bilmirdik ki, onun mədəsində yara var. Amma gözlərindən əməliyyat keçirəndən sonra üç dəfə “İddialı qaraçı” tamaşasında oynamışdı. Sağlam idi, hansısa xəstəlikdən əziyyət çəkdiyi xarici görünüşündən hiss olunmurdu”.

Truppa müdiri E. Əhədzadə ilə teatrda vida mərasiminin keçirilməməsinin səbəbinin teatrın fasadında gedən təmir olduğunu deyib.

Xalq artisti Yaşar Nuri də bu xəbərin onun üçün gözlənilməz olduğunu söyləyib: “Xəstə olduğunu eşitmişdim. Zəng vurdum həyat yoldaşı ilə danışdım. Tanış həkimlə əlaqə saxlayıb aparıb göstərdik. Məlum oldu ki, hepatit C-dən əziyyət çəkir. Onu sonuncu dəfə “Məşədi İbad” tamaşasının məşqinə gedəndə Milli Parkda gördüm. Özünü yaxşı hiss edirdi, amma xəstəlik gələndə batmanla gəlir. Xüsusən son illərdə vətənpərvər mahnıların ifaçısı kimi ürəklərdə sevildi”.

Y. Nuri onu da deyib ki, sənətkarla vida mərasiminin keçirilməsi vacibdir və yaxşı olardı ki, E. Əhədzadə son mənzilə teatrdan yola salınardı.

Xalq artisti İlham Namiq Kamal E. Əhədzadəni uzun illərdir tanıdığını və onun insanlığına, sənətkarlığına hörmət etdiyini bildirib: “Teatrın mövsümü açılanda bütün kollektivlə bərabər Elxan Əhədzadə də gəlmişdi, əhval-ruhiyyəsi də çox yaxşı idi. Mən onu neçə illərdir, tanıyıram. Hərtərəfli inkişaf etmiş bir sənətkar idi. Əksər dövlət tədbirlərinin bağlanışına Elxan Əhəzadənin gözəl səsi ilə yekun vurulurdu. Çox səmimi və tərbiyəli insan idi. Bu cür insanların Azərbaycan incəsənətindən getməsi yoxsulluq və kasıblıq yaradacaq. Bu cür insanlara dəyər verilməməsi xeyli vaxtdır davam edir. Bu, yaxşı hal deyil”.

Ailəsi və sənət dostları vidalaşdıqdan sonra xalq artisti E. Əhədzadə Xırdalan qəbiristanlığında torpağa tapşırılıb.

Qeyd edək ki, mərhum E. Əhədzadənin birinci evlilikdən bir, ikinci evlilikdən də bir oğlu var. İkinci evlilikdən olan oğlu 4 yaşındadır. Mərhum uzun müddət mədə və on iki barmaq bağırsağında yaradan və hepatit C-dən əziyyət çəkib. Son bir ayda isə onun vəziyyəti çox pisləşib və bu gün səhər saat 05:30 radələrində o, dünyasını dəyişib.

Elxan_Əhədzadə