İncəsənət

Ana səhifə

İncəsənət

Hüseyn Seyidzadənin xatirə gecəsi keçirilib

03 noyabr 2010 16:35 (UTC +04:00)

Bakı. Ülkər Qasımova – APA. Bu gün Azərbaycan Dövlət Film Fondunda görkəmli rejissor Hüseyn Seyidzadənin 100 illik yubileyi ilə əlaqədar xatirə gecəsi keçirilib.

APA-nın məlumatına görə, fondun foyesində rejissorun həyat və yaradıcılığını əks etdirən, eyni zamanda film-çəkilişlərdən olan fotolar və kinolarının afişalarından ibarət sərgi nümayiş olunub.

Anım tədbirinə Hüseyn Seyidzadənin həyat və yaradıcılığını əks etdirən çarxın nümayişi ilə başlanılıb. Daha sonra fondun direktoru, əməkdar incəsənət xadimi Cəmil Quliyev H.Seyidzadənin Azərbaycan kino tarixindəki danılmaz xidmətlərindən danışıb. O bildirib ki, Hüseyn Seyidzadə Moskvada görkəmli kino ustaları Mixail Romm və Sergey Eyzenşteyndən dərs alıb. C.Quliyev çıxışında bildirib ki, Hüseyn Seyidzadə aktyorların daxili aləmini üzə çıxaran rejissorlardan biri olub.

Daha sonra kinoşünas Aydın Kazımzadə görkəmli rejissorun həyat və yaradıcılığı barədə geniş məlumat verib. O Əlisəttar Atakişiyev, Əliağa Ağayevin də vaxtilə ona danışdığı xatirələri, film çəkiləri barədə maraqlı məqamları tədbir iştirakçıları ilə bölüşüb. Xatirə gecəsində İlham Namiq Kamal, Ziya Şıxlinski də mərhum rejissor barədə fikirlərini bölüşüblər. Tədbirdə görkəmli rejissorun lentə aldığı “O olmasın, bu olsun”, “Dəli Kür”, “Qayınana” və “Koroğlu” filmlərindən fraqmentlər nümayiş olunub.