İncəsənət

Ana səhifə

İncəsənət

Kanadalı aktyorlar Azərbaycan səhnəsinə yağış yağdırıblar

29 noyabr 2010 11:39 (UTC +04:00)

Bakı. Ülkər Qasımova – APA. Azərbaycan Dövlət Rus Darm Teatrında Kanadanın “Eluaz” sirkinin ifasında “Yağış” tamaşası nümayiş etdirilir. APA-nın məlumatına görə, son nümayişi sabah, yəni noyabrın 30-da baş tutacaq möhtəşəm səhnə əsərinin Bakı səhnəsində göstərilməsi Çexov adına Beynəlxalq Teatr Festivalının “İpək yolu” mərhələsi çərçivəsində həyata keçirilir.

“Eluaz” sirkinin aktyorları tərəfindən göstərilən “Yağış” tamaşası 2004-cü ildə Daniele Finsi Paska tərəfindən tamaşaya qoyulub. “Yağış” sirk, akrobatika, yeni, fərqli teatr elementləri ilə zəngindir. Tamaşada aktyorlar həm sirk tryukları göstəriblər, həm musiqi alətlərində çalıb oxuyublar və uşaqlıq xatirələrindən, arzularından, qorxularından və ilk məhəbbətlərindən danışıblar. Tamaşada peşəkar aktyor heyətinin ifasında təhlükəli və Azərbaycan tamaşaçısının səhnədə görməyə öyrəncəli olmadığı hərəkətlər də maraqla qarşılanıb. Hər nümayişi anşlaqla baş tutan tamaşanın sonu rezonans doğurub. Belə ki, bu göstərinin sonu elə tamaşnın adına uyğun olaarq “Yağış”ın yağması ilə yekunlaşıb. İlk dəfə olaraq Rus Dram Teatrının səhnəsi bütünlüklə suyla örtülüb. Aktyorlar sürəkli yağan yağış altında yaddaqalan çıxışlar nümayiş etdiriblər. Aktyorlar bütünlüklə suyla dolmuş səhnədə tamaşaçılara unudulmaz anlar yaşadıblar. Yağışın yağması tamaşanın kuliminasiya nöqtəsi olub. 2 saat 20 dəqiqə davam edən bu tamaşada kanadalı aktyorların əsasən rus dilində danışması da diqqət çəkən məqamlardan biri olub. Tamaşanın bəzi hissələrində Azərbaycan dilindən də istifadə olunması yerli izləyicilərə xoş gəlib. Kanadalı aktyorlar tamaşaçılar tərəfindən uzun müddət ayaq üstə alqışlanıblar.

Kanadanın “Eluaz” sirkinin bədii rəhbəri Jan Penşo, əsas aktyorları isə Oksana Burli və Karr Eşlidir.

Kanadanın “Eluaz” sirkinin Bakı səhnəsində çıxışı “Procent” şirkətinin təşkilatçılığı, Mədəniyyət və Turizm Nazirliyinin, Azərbaycan Teatr Xadimləri İttifaqının dəstəyi ilə baş tutub.