İncəsənət

Ana səhifə

İncəsənət

Gələn ay Bakıda Avropa Film Festivalı keçiriləcək – FOTO

Gələn ay Bakıda Avropa Film Festivalı keçiriləcək – <font color=red>FOTO </font>

29 noyabr 2010 13:27 (UTC +04:00)

Bakı. Ülkər Qasımova-APA. Bakıda Avropa Film Festivalı keçiriləcək. APA-nın məlumatına görə, festival Avropa İttifaqının Azərbaycandakı Nümayəndəliyinin təşkilatçılığı ilə baş tutacaq. Bu gün festivalla bağlı keçirilən mətbuat konfransında Avropa İttifaqının Bakı nümayəndəliyinin rəhbəri, səfir Roland Kobia festivalın 10-16 dekabr tarixlərində keçiriləcəyini deyib. O bildirib ki, Avropa Film Festivalında 14 Avropa İttifaqı (Aİ) ölkələrindən (Belçika, Bolqarıstan, Çex Respublikası, Almaniya, Yunanıstan, Fransa, İtaliya, Litva, Macarıstan, Hollandiya, Avstriya, Polşa, rumıniya, Böyük Britaniya) filmlər nümayiş etdiriləcək: “Filmlər Avropada müxtəlif ictimai təbəqələri narahat edən miqrasiya, işsizlik, bürokratiya, yaşlaşmaq kimi məsələlərdən başlayaraq qlobal istiləşməyədək olan ictimai və qlobal mövzuları əhatə edir. Bakıda Avropa Film Festivalı sonuncu dəfə iki il öncə keçirilmişdi, ancaq həmin festivalda nümayiş olunan filmlərin sayı daha az idi. Bu layihəni biz gələcəkdə də davam etdirmək niyyətindəyik. Biz bu layihəni gəlir üçün yox, mədəniyyətlərin tanıdılması və öyrənilməsi üçün həyata keçiririk”. Festival Belçikanın “Hop” filmi ilə başlayacaq. Film deportasiyaya məruz qalmış, Brüsseldə yaşayan qeyri-qanuni immiqrantlar Castin və onun atası Dibondan bəhs edir. Festivalın məhz Belçika filmi ilə açılmasının səbəbi ölkənin Avropa İttifaqına sədrlik etməsi ilə bağlıdır.

Mətbuat konfransında qeyd olunub ki, Avropa Film Festivalında təqdim olunan bütün filmlər ingilis dilində, bir neçəsi isə Azərbaycan və rus dilində olan subtitrlərlə veriləcək. Bu cür festivalın keçirilməsi digər mədəniyyətlərlə daha yaxından tanışlıq məqsədi daşıyır. 11-16 dekabr tarixlərində olan filmlər 18:00 və 20:00-da başlayacaq, bazar günü, yəni dekabrın 12-si, saat 17:00-da məktəblilər üçün xüsusi filmin nümayişi nəzərdə tutulur. Bu festivalda nümayiş olunacaq bütün filmlərə giriş pulsuzdur.

Bakıda Avropa Film Festivalı Avropa İttifaqının Azərbaycandakı Nümayəndəliyinin Azərbaycan Mədəniyyət və Turizm Nazirliyi və Azərbaycanda təmsil olunan Aİ-na üzv ölkələrin səfirlikləri ilə birgə təşkil olunur.