İncəsənət

Ana səhifə

İncəsənət

Tiflisdə Azərbaycan Bəstəkarlar İttifaqının sədri Firəngiz Əlizadənin əsərlərindən ibarət konsert keçirilib - FOTO

Tiflisdə Azərbaycan Bəstəkarlar İttifaqının sədri Firəngiz Əlizadənin əsərlərindən ibarət konsert keçirilib - <font color=red>FOTO</font>

06 dekabr 2010 07:39 (UTC +04:00)

Tiflis. Nizami Məmmədzadə - APA. Gürcüstan Milli Musiqi Mərkəzində (GMMM) Azərbaycan Bəstəkarlar İttifaqının sədri, xalq artisti Firəngiz Əlizadənin müəllif konserti olub. APA-nın Gürcüstan bürosunun məlumatına görə, tədbirdə konsertin təşəbbüskarı və təşkilatçısı, GMMM-in direktoru Niko Mimonişvili çıxış edərək, bəstəkarın yaradıcılığı barədə iştirakçılara məlumat verib. Bəstəkarın fəaliyyətinə həsr olunan, Parisdə çəkilmiş klip nümayiş etdirilib. Daha sonra Firəngiz Əlizadənin əsərləri səsləndirilib.
Tədbirdə Türkiyə, Yaponiya, Azərbaycanın və digər ölkələrin Gürcüstandakı səfirləri, Gürcüstan ictimaiyyətinin nümayəndələri, bəstəkarlar, gürcü və azərbaycanlı ziyalılar, incəsənət xadimləri iştirak ediblər. Müəllif konserti iki bölümdə baş tutub.

Tədbir zamanı Tiflisdə fəaliyyət göstərən Mirzə Fətəli Axundov adına Mədəniyyət Muzeyi tərəfindən Azərbaycan incəsənət nümunələrini əks etdirən sərgi təşkil edib.

F. Əlizadə jurnalistlərə açıqlamasında bildirib ki, Gürcüstana səfəri zamanı bir çox görüşlər keçirib: “Gürcüstan ictimaiyyəti məni çox yaxşı qarşıladı. Mənim Gürcüstan Bəstəkarlar İttifaqında, Konservatoriyada və onun muzeyində bir sıra görüşlərim olub. Gürcü ictimaiyyəti məni çoxdan tanıyır. Mənim üçün önəmlisi odur ki, musiqilərimi tamaşaçılar qəbul etsinlər. Düşünürəm ki, onlar əsərlərimi qəbul etdilər. Gürcüstan bəstəkarları ilə çox yaxşı münasibətlərimiz var. Gürcüstanın ən məşhur bəstəkarı Giya Kançeli ilə Berlində və İsveçdə birgə konsertlər vermişik. Gürcüstanla həmişə qardaş münasibətlərimiz olub. Bizim musiqimiz onlar tərəfdən ifa olunub, onların musiqiləri də bizim tərəfimizdən. Bizim çox böyük dostluq əlaqələrimiz, həm də yaradıcılıq əlaqələrimiz davam edir. Musiqi bizim xalqları möhkəm tellərlə birləşdirir”.