İncəsənət

Ana səhifə

İncəsənət

Yaşar Nuri və Vaqif İbrahimoğlu Yeni ili xəstəxanada qarşılayacaqlar

24 dekabr 2010 13:32 (UTC +04:00)

Bakı. Ülkər Qasımova-APA. Azərbaycanın xalq artisti, Azərbaycan Dövlət Akademik Milli Dram Teatrının aktyoru Yaşar Nuri, eləcə də Dövlət Yuğ Teatrının baş rejissoru Vaqif İbrahimoğlu 2011-ci ili Türkiyədə xəstəxanada qarşılayacaqlar. Dövlət Akademik Milli Dram Teatrının direktoru İsrafil İsrafilov APA-ya açıqlamasında bildirib ki, Memorial Xəstəxanada müalicə olunan Yaşar Nuri və İzmirdə Qazi Üniversitetinin Hospitalında müalicə alan Vaqif İbrahimoğlunun yanvarın sonlarında Azərbaycana qayıdacağı gözlənilir: “Onların səhhətindəki problemlərinin tam həlli üçün hələ bir müddət orada qalmaları gərəklidir. Onları yeni il bayramı üçün Azərbaycana təcili yardım maşınında gətirmək lazım deyil. Hər biri sağ və salamat, ayaqları üstə Vətənə gələcəklər”. İ. İsrafilov bildirib ki, Yaşar Nurinin Yeni il bayramını təbrik etmək məqsədi ilə teatr adından Memorial Xəstəxanaya teleqram vuracaq.

Teatr rəhbərinin sözlərinə görə, bir neçə gün qan təzyiqinin qalxması səbəbindən xəstəxanada müalicə olunan xalq artisti Siyavuş Aslan isə artıq evə buraxılıb: “Siyavuş Aslanın müalicəsi ev şəraitində davam edir. Özünü yaxşı hiss edir. Mən bildirmək istərdim ki, səhhətində problemlər yaranan teatr xadimlərimizin hər birinə xüsusi qayğı və diqqət var. Mədəniyyət və Turizm Nazirliyi hər birinə həm maddi, həm də mənəvi dəstək olur”.

İsrafil İsrafilov onu da bildirib ki, rəhbərlik etdiyi teatrda yenidən işə qəbulla bağlı keçirilməsi nəzərdə tutulan müsabiqə Siyavuş Aslan, Yaşar Nuri və İlham Əsgərov üçün problem olmayacaq. Hər bir aktyorun Azərbaycan teatrı üçün çox önəmli sima olduğunu diqqətə çatdıran teatr rəhbəri, bu prosesdə onlar üçün çətinlik olmayacağını deyib: “Görünən dağa nə bələdçi? İstər Siyavuş Aslan, istər Yaşar Nuri, istərsə də İlham Əsgərov üçün müsabiqədə çətinlik olmayacq. Onların hər biri teatrımızın önəmli simalarıdır. Siyavuş Aslan evimizin bərəkəti, Yaşar milli sərvətimizdir. İlham Əsgərov isə tamaşalarımızın baş rol ifaçısıdır. Hazırda “Hökmdar və qızı” tamaşasının məşqi də onsuz gedir. O tamaşada da əsas rolun ifaçısı odur”.

İsrafil israfilov Siyavuş Aslanın üç ilə yaxındır ki, Akademik Milli Dram Teatrında heç bir tamaşada oynamadığını da qeyd edib: “75 yaşlı Siyavuş Aslanmız sonuncu dəfə bir neçə il bundan əvvəl teatr səhnəsinə çıxıb. Ancaq buna baxmayaraq o hər zaman bizim teatrın işçisi olacaq. Sözsüz ki, keçiriləcək müsabiqədə bütün bunlar nəzərə alınacaq. Onların heç birinin bu imtahana ehtiyacı yoxdur. Bunu güzəşt də adlandırmaq olmaz, sadəcə onlar teatrımızın simalarıdır. Onlar Azərbaycan teatrının ən böyük qənimətidir”.

Daxili İşlər Nazirliyinin Hospitalında müalicə olunan xalq artisti İlham Əsgərovun səhhətində isə dəyişiklik yoxdur. Aktyor hələ də xəstəxananın reanimasiya şöbəsindədir və həkimlər ona ayağa durmağa icazə vermirlər.