İncəsənət

Ana səhifə

İncəsənət

İtaliyanın Pikkolo Teatrının rəhbəri Akademik Milli Dram Teatrında Covanni Verqanın “Dişi canavar” əsərini səhnələşdirəcək

14 fevral 2011 07:54 (UTC +04:00)

Bakı. Ülkər Qasımova-APA. Bu il ərzində Azərbaycan Dövlət Akademik Milli Dram Teatrında Mədəniyyət və Turizm Nazirliyinin dəstəyi ilə bir sıra beynəlxalq layihələr gerçəkləşəcək. Teatrın mətbuat katibi Elçin Cəfərovun APA-ya verdiyi məlumata görə,
Akademik Milli Dram Teatrının direktoru İsrafil İsrafilov K. Marcanişvili adına Dövlət Akademik Dram Teatrının baş müdiri Yekaterina Mazmişvilinin dəvəti ilə Tiflisdə işgüzar səfərdədir. Səfərdə qarşılıqlı əməkdaşlıqla bağlı məsələlər müzakirə olunacaq. Yaxın zamanlarda K. Marcanişvili adına Dövlət Akademik Dram Teatrının bədii rəhbəri Levan Çuladzenin Akademik Milli Dram Teatrında tamaşa hazırlaması planlaşdırılır. Görüşdə bu məsələnin detalları ilə bağlı müzakirələr də keçiriləcək.

Tiflisdən qayıtdıqdan sonra İsrafil İsrafilovun İtaliyanın Milan şəhərinə işgüzar səfəri planlaşdırılır. Sözügedən səfər 20-28 fevral tarixlərində reallaşacaq. Akademik Milli Dram Teatrının direktoru Milana Pikkolo teatrının rəhbəri Luka Ronkoni ilə görüşmək və qarşılıqlı əməkdaşlıqla bağlı bəzi məsələləri müzakirə etmək məqsədi ilə yollanır. 2012-ci ildə Luka Ronkoninin Akademik Milli Dram Teatrının səhnəsində Covanni Verqanın «Dişi canavar» əsəri əsasında tamaşa hazırlaması planlaşdırılır. Bu barədə danışıqlar və onun yeni tamaşaları ilə tanışlıq İ. İsrafiovun Milan səfərinin əsas məqsədidir.

Qeyd edək ki, Milanın Pikkolo Teatrı 1947-ci ilin may ayında P.Qrassi və C.Strellerin rəhbərliyi ilə yaranıb və tezliklə İtaliyanın, həmçinin dünyanın aparıcı teatrlarından birinə çevrilib. Teatr rus yazıçısı M. Qorkinin «Həyatın dibində» pyesi əsasında hazırlanmış ilk tamaşasını Via Rovelloda oynayıb. Pikkolo Teatrı yarandığı zamandan zəngin repertuara malik olub. Teatrın repertuarında dünya və İtaliya klassikasının və müasir dramaturgiyasının nümunələri yer alır. Teatrın uğuru və şöhrəti daha çox teatrın banisi dünya şöhrətli rejissor Corc Strellerin adı ilə bağlıdır. Hazırda Pikkolo Teatrı Avropa Teatrları İttifaqının üzvüdür. 1999-cu ildən etibarən Pikkolo Teatrına Luka Ronkoni (1933) başçılıq edir. L. Ronkoni hələ Pikkolo Teatrının bədii rəhbəri vəzifəsində çalışana qədər uzun müddət teatr fəaliyyəti ilə məşğul olub.