İncəsənət

Ana səhifə

İncəsənət

Dünya şöhrətli Robertino Loretti Bakıda konsert verib – FOTOSESSİYA

Dünya şöhrətli Robertino Loretti Bakıda konsert verib – <font color=red>FOTOSESSİYA </font>

14 fevral 2011 10:06 (UTC +04:00)

Bakı. Ülkər Qasımova – APA. Fevralın 13-də İtaliyanın dünya şöhrətli müğənnisi Robertino Loretti ilk dəfə olaraq Bakı səhnəsində çıxış edib. APA-nın məlumatına görə, əfsanəvi Robertino Loretti Azərbaycan tamaşaçıları ilə Heydər Əliyev Sarayında görüşüb. R. Lorettinin Bakı konserti Azərbaycan Dövlət Uşaq Filarmoniyasının solisti Emin Eminzadənin ifasında “Jamayka” və İslam Qasımovun ifasında “O Sole mio” mahnısı ilə başlayıb. Hətta italiyalı müğənni E.Eminzadəni “Azərbaycanın Robertinosu” adlandırıb. Azərbaycanın istedadlı uşaqlarının ifasını alqışlayan dünyaşöhrətli müğənni, onlara uğurlar arzulayıb və gələcəkdə çox məşhur musiqiçi olacaqlarına əmin olduğunu diqqətə çatdırıb. R. Loretti “Jamayka”, “Ave Maria”, “Santa Lucia”, “O Sole mio”, “Mamma”, “Un bacio piccolissimo” və digər mahnılarını ifa edib. Konsertdə kiçik fasilə verən Robertino Loretti Heydər Əliyev Sarayının tamaşaçıları üçün hazırladığı sürprizləri həyata keçirməyə şərait yaradıb. Seyrcilər üçün təşkil olunan müsabiqədə Robertino Lorettinin yaradıcılığı ilə bağlı müxtəlif suallar verilib. Sualları düzgün cavablandıran tamaşaçılar Fəxriyyə Xələfovanın “Nuray” ətriyyat kolleksiyasından, martın 12-də keçirilməsi nəzərdə tutulan Anjelika Varum və Leonid Aqutinin konsertinə iki nəfərlik dəvətnamə qazanıblar. Bir xanım tamaşaçı isə Robertino Loretti ilə şam etmək şansı qazanıb. Bu hədiyyələrdən birini “Jamayka” mahnısını ifa edən və müğənninin canlı ifasını dinləməyə gələn sənətçi Amil Həsənoğlu qazanıb.
R. Loretti səhnədə ansamblla yox, Maestro Fabrizio Mascinin müşayiəti ilə çıxış edib. İki saatlıq proqramda ifadan əlavə o Azərbaycan haqqında da danışıb: “Azərbaycanda ilk dəfə çıxış edirəm. Ümumiyyətlə, istər ölkə, istər xalq olaraq sizləri çox sevdim. Bu gözəl ölkə, gözəl şəhər və gözəl insanları sevməmək qeyri-mümkündür. Hələ Azərbaycan xalqının istedadına heyran oldum. Xalqınız çox istedadlıdır, bu qədər istedadlı olmağınız məni qürurlandırır”.

İtaliyalı müğənni Azərbaycan haqqında xoş sözlərlə konsertinin başa vurmaq istəsə də, tamaşaçılar onun zaldan getməsinə razı olmayıblar. Robetino proqramına daha bir mahnını əlavə edib. O, tamaşaçılarla Azərbaycan dilində sağollaşıb.

Xatırladaq ki, Robertino Loretti 1947-ci ildə Romada anadan olub. Debüt albomu 1961-ci ildə işıq üzü görüb. Uşaqkən bir neçə filmdə epizodik rollara çəkilib. İfaçı artıq 8 yaşında ikən Roma Opera Teatrında oxuyub. R. Lorettinin “O sole mio” adlı məşhur sinqli “Qızıl sinql” adını qazanıb. 1964-cü ildə 17 yaşında olarkən “San- Remo” festivalında finala vəsiqə qazanıb. Bir müddət özünü kino və biznes sahəsində sınayan müğənni 1982-ci ildən yenidən qastrollara başlayıb. Onun ifasında “Ave Maria”, “Santa Luçia”, “Jamayka” mahnıları çox məşhurdur.

Robertina _ Loretti Bakı _Konsert