İncəsənət

Ana səhifə

İncəsənət

Bəstəkarlar İttifaqında “Üzeyir işığında” kitabının təqdimatı keçirilib

08 iyun 2011 14:45 (UTC +04:00)

Bakı. Ülkər Qasımova – APA. Azərbaycan Bəstəkarlar İttifaqında (ABİ) əməkdar incəsənət xadimi Sərdar Fərəcovun “Üzeyir işığında” kitabının təqdimatı keçirilib. APA-nın məlumatına görə, tədbirdə çıxış edən ABİ-nin sədri, xalq artisti Firəngiz Əlizadə Üzeyir Hacıbəyliyə həsr olunmuş “Üzeyir işığında” kitabını yüksək sənətkarlıqla yazılmış nadir kitab kimi dəyərləndirib. F. Əlizadə bildirib ki, bəstəkar Sərdar Fərəcov musiqişünas kimi elmi yaradıcılığının böyük hissəsini məhz Üzeyir Hacıbəyli irsinə həsr edib.
Kitabın müəllifi Sərdar Fərəcov Üzeyir Hacıbəylinin ev-muzeyinin arxivində, dahi bəstəkarın öz əlilə yazdığı bir çox əlyazmaların hələ də geniş musiqi ictimaiyyətinə çatdırılmadığını bildirib. Müəllif vurğulayıb ki, toplanmış əlyazmalar içərisində nadir sənət nümunələri - esselər, resenziyalar, müxtəlif əsərlər haqqında bəstəkarın düşündükləri neçə illərdən sonra da çox dəyərli və aktualdır: “Tapılmış əlyazmalar içərisində vaxtilə radioda səsləndirilmiş, sonralar yaddan çıxmış “Qu nəğməsi” radio pyesi, bəstəkarın öz əlilə məhv etdiyi güman olunan “Şeyx Sənan” operasından üç musiqi parçası, vaxtilə yazılmış “Ər və arvad” librettosu və ona aid üç musiqi parçası, 1920-ci illərdə yazılmış “Milli marş”, “Azərbaycan marşı” və digər nadir əlyazmalar var”.

Daha sonra çıxış edən əməkdar incəsənət xadimi, bəstəkar Rauf Əliyev, Üzeyir Hacıbəyli adına Bakı Musiqi Akademiyasının professorları İmruz Əfəndiyeva, Zemfira Qafarova və başqaları S. Fərəcova minnətdarlıqlarını bildirib və nəşrin akademiyada dərs vəsaiti kimi tədris olunması təklifini irəli sürüblər.
Tədbirdə Bakı Musiqi Akademiyasının professorları Ülviyyə Hacıbəyova və Yeganə Axundova bəstəkarın musiqilərindən parçalar ifa ediblər.

Sonda S. Fərəcovun ssenarisi əsasında rejissor Tahirə Hüseynovanın ərsəyə gətirdiyi və Ü.Hacıbəyliyə həsr edilmiş “Əbədi iftixarımız” sənədli filmi nümayiş etdirilib.

Sərdar Fərəcov _ Üzeyir Hacıbəyli