İncəsənət

Ana səhifə

İncəsənət

“Qorxma mən səninləyəm” filminin davamının çəkilişinə 12 milyon dollara yaxın vəsait xərclənəcək

20 iyun 2011 10:29 (UTC +04:00)

APA-nın Rusiya mətbuatına istinadən yaydığı xəbərə görə, bu barədə filmin rejissoru Yuli Qusman məlumat verib. Dinamik və qəhrəmanların romantik əlaqələrlə dolu “Qorxma mən səninləyəm” filmi 1982-ci ildə işıq üzü görüb və kifayət qədər məşhurlaşıb. Rejissorun sözlərinə görə, filimin davamını çəkmək fikrinə filmin ilk versiyası göstəriləndən sonra düşüb: “Həm Lev Durov, həm Muxtarbek Kantemiov, həm də Polad Bülbüloğlu çoxdan bir yerdə bu romantik filmdə şərq muşketyor obrazında çəkilmək istəyiblər. Buna baxmayaraq, yeni süjet tapmaq və Azərbaycan, eyni zamanda Rusiya tərəfdən lazımı sazişlərin imzalanmasına 30 il lazım oldu. Artıq avqustun axırında filmin çəkilişlərinə başlamaq niyyətindəyik. Filmin adı “Qorxma mən səninləyəm – 1919” adlanılacaq. Bunun üçün kostyumlar, dekorasiyalar hazırlanır və hər biri böyük əziyyət hesabına başa gəlir. Çünki indi filmin rəssamı senzuranın diktəsi deyil, pulun diktəsinə məruz qalır. Həm də rejissor bu gün kifayət qədər populyar olan triller, dram və faciə janrında filmlər çəkmir. O daha çox romantik filmlərə, musiqili komediyalara üstünlük verir, bu da indiki zəmanədə sərmayəçiləri elə də cəlb etmir”.

Çəkiliş qrupunun hesablamalarına görə, filmin tam büdcəsi 12 milyon dollar, ən azı isə 9 mln dollar təşkil edəcək. Rejissorun dediyinə görə, onlar hələ heç o pullardan üçdə birini belə yığa bilməyiblər: “Biz əvvəldən müəyyən etmişik ki, bu Azərbaycan-Rusiya birgə layihəsi olacaq. Rusiyada hazırda kinematoqrafiya sahəsində müəyyən problemlər var. Azərbaycan isə kinoya bu ölkə üçün çox pul verib, lakin o pul da kifayət etmir. Bizim məsəlimiz kifayət qədər çətindir. Filmin süjeti əsrin əvvəlindən bəhs edir, tarixi kostyumlar, ingilis ordusu, atlar və digər məsələlər cox pul tələb edir. Ancaq mən çox xoşbəxtəm ki, bütün köhnə dostlarım, iş yoldaşlarım bu işə böyük səy göstərirlər. Azərbaycanda isə bu film çox populyardır və heç kim bu işdə köməyini əsirgəmir”.

Filmdə Lev Durov, Muxtarbek Kantemirov və Polad Bülbüloğludan başqa, yeni qəhrəmanlar da olacaq: “Filmdə təhlükəli macəralar da olacaq və təbii ki, iki gənc qəhrəmanın - şərq Romeo və Cülyettasının eşq macərasından bəhs ediləcək.
Qızın atası bəstəkar və millət vəkilidir, oğlanın atası isə quldurdur. O da millət vəkilidir. Rollardan birini – San Sanıçın şagirdinin rolunu Edqard Zapaşnıy oynayacaq. Mən sirki çox sevirəm və işdən başım yaxşı çıxır. Mənim fikrimcə, E. Zapaşnıy yeni nəslin parlaq təmsilçilərindəndir. O istedadlı artistdir, gözəldir, cəsurdur”.