İncəsənət

Ana səhifə

İncəsənət

Azərbaycan və Türkiyənin müştərək işi olan “Mahmud və Məryəm” filminin çəkilişləri təxirə salınıb

25 noyabr 2011 10:50 (UTC +04:00)

Bakı. Ülkər Qasımova – APA. Azərbaycan və Türkiyənin müştərək istehsalı olacaq, xalq yazıçısı Elçinin “Mahmud və Məryəm” romanı əsasında eyni adlı filmin noyabrın sonlarından start verilməsi nəzərdə tutulan çəkilişləri təxirə salınıb. Bununla bağlı APA-ya məlumat verən filmin baş məsləhətçisi və Qəmərbanu obrazının ifaçısı Məlahət Abbasova çəkilişlərin təxirə salınmasının hava şəraiti ilə əlaqədar olduğunu açıqlayıb.
M.Abbasovanın sözlərinə görə, filmin əsas yaradıcı heyəti çəkilişlərə 2012-ci ilin mart ayında başlanmasına qərar verib: “Əslində filmin çəkilişlərinə noyabrda başlanılması əvvəldən qərarlaşdırılmışdı. Amma hava şəraiti bu planın gerçəkləşməsinə hələlik mane oldu. Xüsusilə də Azərbaycanın bölgələrindəki hava şəraiti çəkilişlərin marta qədər təxirə salınmasına səbəb oldu”.
Məlumata görə, “Mahmud və Məryəm” filmini Hollivuddan xüsusi olaraq dəvət olunmuş operator lentə alacaq.

Qeyd edək ki, filmdə Məryəm rolunu 23 yaşlı Ezgi Asaroğlu, Mahmud rolunu Alper Saldıran oynayacaq. Filmin Azərbaycandakı çəkilişlərinin Şəki, Qax, Qəbələ və Bakıda aparılması nəzərdə tutulur. “Mahmud və Məryəm” filminin bəstəkarı əməkdar incəsənət xadimi Aygün Səmədzadədir. Azərbaycan və Türkiyənin müştərək işi olan “Mahmud və Məryəm” filminin rejissoru türk əsilli İngiltərə rejissoru Mətin Hüseyn, prodüseri isə Sevda Kayqısızdır. Çəkilişlər Azərbaycanda və Türkiyədə aparılacaq. Filmin çəkilişinə Azərbaycan və Türkiyənin mədəniyyət nazirlikləri dəstək verir. Filmin ərəb və Avropa ölkələri də daxil olmaqla, 30-dan çox ölkədə satışı planlaşdırılır.

Mahmud və Məryəm filmi