İncəsənət

Ana səhifə

İncəsənət

Dünyanın məşhur üç tenoru Bakıda Müslüm Maqomayevin repertuarından əsərləri ifa edəcəklər

29 noyabr 2011 15:00 (UTC +04:00)

Bakı. Ülkər Qasımova – APA. Azərbaycan səhnəsində üç tenor məşhur ifaçı Mario Lantsaya həsr olunmuş konsert proqramı ilə çıxış edəcək. “Buta” İncəsənət Mərkəzinin yeni layihəsi dekabrın 3-də Bakıda Azərbaycan Dövlət Filarmoniyasında gerçəkləşəcək.
“Buta” İncəsənət Mərkəzinin pr meneceri Fuad Hətəmovun APA-ya verdiyi məlumata görə, tenorlar əfsanəvi Müslüm Maqomayevin repertuarından əsərləri səsləndirəcəklər. Konsert Buta İncəsənət Mərkəzi və Rusiyanın “Dünya İstedadları” Fondunun əməkdaşlığı ilə həyata keçirilir. Konsertdə tenorlar Alexandro Olmedo (ABŞ), David Qvinianidze (Rusiya) və Anton İvanov (Rusiya) çıxış edəcəklər. Buta İncəsənət Mərkəzinin direktoru Nəsib Piriyev konsert proqramı haqda bunları deyib: “Mərkəzimizin bu yeni layihəsi klassik vokal musiqisinin, tenor ifasının gözəlliyini insanlara təqdim edəcək və ölməz Müslüm Maqomayevin irsini bir daha bizlərə xatırladacaq. Biz Bakı tamaşaçılarını klassik musiqi sahəsində orijinal layihə ilə bir daha sevindirməkdən məmnunluq duyuruq”.

Qeyd edək ki, David Qvinianidzenin rəhbərlik etdiyi “Dünya İstedadları” Fondu Rusiyanın ən yaxşı konsert təşkilatlarından biridir. Fond müasir musiqi aləmində çətin vəzifələrdən birinin öhdəsindən gəlir – klassik vokal musiqisinin gözəlliyini məşhurlaşdırır.

tenor_ Müslüm Maqomayev