İncəsənət

Ana səhifə

İncəsənət

Finlandiyada yaşayan azərbaycanlı prodüser Tahir Əliyev Berlində keçiriləcək ənənəvi 62-ci “Berlinale” Beynəlxalq Film Festivalına dəvət alıb – FOTO

26 dekabr 2011 12:35 (UTC +04:00)

Həmyerlimiz eyni zamanda “Eurovision” mahnı müsabiqəsinin İctimai Televiziyanın Əsas İşçi Qrupunda Nümayəndə heyəti Meneceri və prodüser vəzifəsində çalışır

Bakı. Ülkər Qasımova – APA. Finlandiyada yaşayan və fəaliyyət göstərən azərbaycanlı prodüser Tahir Əliyev gələn il fevralın 9-dan 19-a kimi Berlində keçiriləcək ənənəvi
62-ci “Berlinale” Beynəlxalq Film Festivalına dəvət alıb. Tahir Əliyevin bu festivalda iştirakçılığa namizədliyi 137 ölkənin 4300 namizədi arasından seçilib. Tahir Əliyevin APA-ya verdiyi məlumata görə, o festivala prodüserlik etdiyi yeni filmlə qatılacaq. “Woman on hold” (“Gözləyən qadın”) filmi Avropanın və Finlandiyanın bir neçə film fondlarından, European Documentary Network (EDN) Avropa Sənədli Filmlər Şəbəkəsindən və İtaliyanın Turin şəhərində keçirilən “Documentary in Europe” forumu tərəfindən çox böyük dəstək alıb. Film Finlandiyanın 1-ci kanalı ilə İspaniyanın Chello
Multicanal ilə birgə Zambiyanın Paytaxtı Lusakada çəkilib. Filmin rəsmi distribüteri Almaniyanın məşhur “Deckert Distribution” şirkətidir. Xatırladaq ki, filmin premyerası 2012-ci ildə olacaq. Filmin çəkilişi həmçinin “Berlinale” film festivalının 2009-cu ilin Talant Market tərəfindən dəstək göstərilib. Artıq 2011-ci ildə prodüser Tahir Əliyev həmin bu filmlə Hollandiyada keçirilən Rotterdam Beynəlxalq Film Festivalında və 2011-ci ilin noyabr ayının sonunda keçirilən Beynəlxalq Amsterdam Film festivalında iştirak edib.

T. Əliyev 2004-cü ildən etibarən Finlandiyada təhsilini davam etdirib və 2007-ci ildə Helsinki Metropolia Universitenin Audio Visual Prodaktion fakültəsini magistr
dərəcəsi ilə tamamlayıb. Tahir Əliyevin 2004-cü ildə ilk cəlb olunduğu sənədli film Finlandiya rejissoru Pirjo Honkasalonin “Melanxoliyanın 3 otağı” filmidir. Film 2005-ci ildə Finlandiyanın ən yaxşı sənədli film mükafatına, Venesiya Film Festivalının İnsan Hüquqları mükafatına və bu kimi müxtəlif film festivallarında 30-a yaxın mükafata layiq görülüb. Son 7 ildə Tahir Əliyev 40-a yaxın sənədli filmin prodüseri olub.

Hazırda Tahir Əliyev gələn il Bakıda keçiriləcək “Eurovision” mahnı müsabiqəsinin İctimai Televiziyanın Əsas İşçi Qrupunda Nümayəndə Heyəti Meneceri və prodüser vəzifəsində çalışır.